ژینگەپارێزێکی خاوەن پێداویستیی تایبەت بە کورسییەکەی لە مەریوانەوە دەچێتە تاران
رووداو دیجیتاڵ
ژینگەپارێزێکی خاوەن پێداویستیی تایبەت لە رۆژهەڵاتی کوردستان، وەک نیشاندانی ناڕەزایەتی دژی کوشتنی کۆڵبەرانی کورد، نەبوونی خزمەتگوزاری بۆ کەسانی خاوەن پێداویستیی تایبەت و گرنگینەدان بە ژینگەی رۆژهەڵاتی کوردستان، بڕیاری دا لە شاری مەریوانەوە بە کورسییەکەوە بچێتە تاران.
کامران دوپلۆرەیی، چالاکڤانی ژینگە و ئەندامی ئەنجوومەنی ژینگەپارێزی زاگرۆس، کە خاوەنپێداویستیی تایبەتە، رۆژی چوارشەممە بڕیاری دا، رێگەی 700 کیلۆمەتری مەریوان بۆ تاران، بە کورسیی خاوەن پێداویستی تایبەت ببڕێت و بچێتە بەردەم پەرلەمانی ئێران لە تاران.
کامران دوپلۆرەیی کە خۆی پێشتر کۆڵبەر بووە و بە تەقەی هێزە سەربازییەکانی ئێران لە کاتی کۆڵبەریدا، قاچی لەدەستداوە، تائێستا 20 جار نەشتەرگەریی قاچی بۆ کراوە و ئێستا خاوەنی قاچی دەستکردە.
ئەو چالاکڤانە دەڵێت وەک دەربڕینی ناڕەزایی لە دژی کوشتنی کۆڵبەرانی کورد ئەو رێگەیە بە کورسی تایبەت دەبڕێت و دەچێتە پەرلەمانی ئێران تاوەکو دەنگی ناڕەزایەتی خۆی بە پەرلەمانتاران بگەیێنێت. ئەو هەروەها دەڵێت؛ ناڕەزایەتییەکەی بۆ دۆخی خراپی ژینگەی رۆژهەڵاتی کوردستان و نەبوونی خزمەتگوزاری بۆ کەسانی خاوەنپێداویستی تایبەتیشە.