رووداو دیجیتاڵ
پێنج گەنج کە تەمەنیان لەنێوان 19 بۆ 24 ساڵە لەلایەن پۆلیسی راپەڕین بە تۆمەتی رفاندنی کچێک دەستگیرکران.
بەڕێوەبەرایەتی پۆلیسی پارێزگای سلێمانی لە راگەیێندراوێکدا ئەمڕۆ (پێنجشەممە، 17-8-2023) دەڵێ ئەو پێنج تۆمەتبارە، كە كچێكیان رفاندبوو، لەلایەن مەفرەزەكانی بنكەی پۆلیسی راپەڕین و لەسەر سكاڵای هاووڵاتییەك دەستگیركران.
بەپێی راگەیێندراوەکە "دوای ئەوەی هاووڵاتییەك ئامادەی بنكەی پۆلیسی راپەڕین بوو و سكاڵای تۆماركرد، كە كچەكەی دیارنەماوە، هێزەكانی پۆلیس لێكۆڵینەوە و بەدواداچوونەكانیان دەستپێكرد، دوای وەرگرتنی بڕیاری دادوەر، شوێنی تۆمەتباران دۆزرایەوە و توانرا سەرجەمیان دەستگیربکرێن."
کچەکە، دوای تەواوكردنی رێكارە یاساییەكان وەک لە راگەیێندراوەکەدا هاتووە "بەبڕیاری دادوەر رادەستی كەسوكاری دەكرێتەوە."
تۆمەتباران تەمەنیان لەنێوان 19 بۆ 24 ساڵە و پێکهاتوون لەمانە:
ژ. أ. أ. لەدایكبووی 2004
هـ. یـ. حـ. لەدایكبووی 1999
ش. ع. م. لەدایكبووی 2001
ر. ر. أ. لەدایكبووی 2003
پ. ج. ح. لەدایكبووی 2002
بەڕێوەبەرایەتیی پۆلیسی پارێزگای سلێمانی دەڵێ "بەبڕیاری دادوەر و بەپێی ماددەی 421 لە یاسای سزادانی عیراقی، تۆمەتباران راگیراون و لێكۆڵینەوە لەگەڵیاندا بەردەوامە."
مادەی 421 لە یاسای سزادانی عێراقی تایبەتە بە رفاندن کە دەڵێ، هەرکەسێک بە بێ فەرمانى دەسەڵاتى تايبەتمەند و جگە لەو حاڵەتانەى لە دەقى ياسا و سيستمەكاندا هاتوون، كەسێكى دەستگیركردبێت، يان دەستبەسەرى كردبێت يان بە هەر رێگە و ئامرازێك بێبەشی كردبێت لە ئازاديیەكەى بە زیندانیکردن سزادەدرێت، بە ماوەیەک کە لە 15 ساڵ زیاتر نەبێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ