رووداو دیجیتاڵ
لە کەرکووک رێوڕەسمی یادی عاشوورا بەرێوەچوو، ئەوانەی ماتەمیان بۆ کوژرانی ئیمام حوسێن گێڕا زۆرینەیان تورکمانی شیعە بوون.
لە بۆنەکەدا 100 کەژاوە خواردن و خواردنەوە بەسەر ماتەمینگێڕاندا دابەش کران، پیر، گەنج، منداڵ و ئافرەت لەخۆیان دەدا و دەیانگوت: "شیعەی عەلی لە زیادبووندایە."
ئەتیلا مەحموود، خاوەن کەژاوەی هاوکارییە دەڵێت: "کەژاوە و حوسەینییە و دەستەی شیعەکان ساڵ لە دوای ساڵ زیاتر دەبێت و رێکخراوتر دەبن، لەم رۆژەدا بە تایبەتی لە پارێزگای کەرکووک دەمانەوێ، ئەو ستەمە نیشان بدەین کە لە ئیمام حوسێن کراوە و پەیڕەوەکەی ئەو، دوای 1400 ساڵ هێشتا ماوە و جێگیرە."
لە شەقامی رێگەی بەغدا - کەرکووک، هێمای شینگێران و وێنەی سەرکردەکانی شیعە، لە بەشێکی زۆری شەقامەکانی کەرکووک هەڵکران، 10 رۆژە تورکمانەکان لێرە خواردن دابەشدەکەن، جلوبەرگی رەشیان پۆشیوە و خۆیان لە هەموو خۆشی دەربڕینێک بەدوور گرتووە.
تەها حەمید، بەشدارێکی بۆنەکەیە و ئاماژەی بەوەکرد: "پشت بەخوا شیعە زیاتر فراوان دەکەین و خزمەتی زیاتریان دەکەین، ئوومەتی ئیسلام دێنە سەر رێگەی ئیمام حوسێن و لەسەر ئەو رێگایە دەمێنن پشت بەخوا."
مستەفا محەممەد بەشدارێکی دیکەیە لەبارەی رۆژی عاشوورا و رێوڕەسمەکانیانەوە گوتی: "بیرۆکەکە تەنیا ئەوە نییە کەژاوەکان زیاد بێت، بەڵکو دەمانەوێت گەشەی پێبدەین و هەموو گەڕەکان بگرێتەوە، تەنیا لە عاشوورا و لە نێو گەڕەکانی تازە و بەشیر و تسعین نەبێت، هەموو پارێزگاکە بگرێتەوە."
لە ماوەی 10 ساڵدا لە کەرکووک، دوو گەڕەکی نوێی شیعەمەزهەبەکان بە ناوەکانی بەدر و سەیادە درووستکراوە، زۆرینەی گەنجەکانیان چەکدارن و لە ریزەکانی حەشدی شەعبین.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ