دروێنەی گەنم لە سنە. وێنە: سیروان عەباس - رووداو
رووداو دیجیتاڵ
لە رۆژهەڵاتی کوردستان و بە دیاریکراوی لە سنووری پارێزگای سنە، دروێنەی گەنم و جۆ دەستیپێکردووە. گوڵەگەنمی ئەمساڵ پڕ دەنک و بەرهەمدارن، بەهۆی بارینی پێویست، چاوەڕواندەکرێت بەرهەمی ئەمساڵ بەراورد بە ساڵانی رابردوو زیاتر بێت.
شەهرام دانایی، کە لە سنووری پارێزگای سنەی رۆژهەڵاتی کوردستان جووتیارە، قسەی بۆ رووداو کرد و گوتی: "گەنمی ئەمساڵ نمرە یەک بوو، سوپاس بۆ خوا لە دە ساڵی رابردوودا، بەرهەمی ئەمساڵ نموونەیی بوو، بارانی باش باری و بەرهەمیشمان باش بوو، لە سنە دوو جۆر گەنم دەکرێت، دێمی و بەراو، دێمییەکە لە هێکتارێک زەویدا، سێ بۆ سێ تۆن و نیو بەرهەمی دەبێت، بەراوەکەش نزیکەی 13 تۆن بەرهەمی دەبێت".
حکومەتی ئێران ئەمساڵ هەر کیلۆیەک گەنم بە 15 هەزار تمەن لە جووتیاران دەکڕێت. شەهرام دانایی دەڵێت: "گەنمەکە دەبەینە سایلۆ، حکومەت نموونەی لێ وەردەگرێت کە دوو جۆرە، باش و خراپ، کە حکومەت بە نرخی جیاواز دەیانکڕێت".
لە سنووری پارێزگای سنە، ئەمساڵ لە نزیکەی 530 هەزار هێکتار زەوی بە گەنم چێنراوە و 35 هەزار و 500 هێکتاری بەراوە.
زۆرترین گەنم لە شارەکانی بیجاڕ، دیواندەرە، سەقز، قوروە و دێولان چێنراوە و چاوەڕوان دەکرێ یەک ملیۆن تۆن گەنم بەرهەم بێت و نزیکەی 850 هەزار تۆنی بە حکومەت بفرۆشرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ