میدیای فەرمیی تورکیا: بەرپرسێکی باڵای پەکەکە لە چیای گارە کرایە ئامانج

 

بەگوێرەی ئەو هەواڵەی میدیای فەرمیی تورکیا بڵاویکردەوە، میت زانیاریی هەبووە لە کۆبوونەوەیەکی نهێنیی چەند بەرپرسێکی پەکەکە و هاتنی شاندێکی باڵای پەکەکە لە قەندیلەوە بۆ چیای گارە. 

 

وەک لە هەواڵەکەدا هاتووە، لەگەڵ دەستپێکردنی کۆبوونەوەی بەرپرسانی پەکەکە، تیمی ئۆپەراسیۆنە تایبەتەکانی میت بەهاوئاهەنگیی لەگەڵ سوپای تورکیا و لە رێگەی فڕۆکەیەکی بێفڕۆکەوانەوە، دوو مووشەکی ئاراستەی شوێنی کۆبوونەوەکە کرد. لە ئەنجامدا کەسێک بەناوی عیزەددین ئینان، ناسراو بە "دێرسیم ماڵاتیا" کە بەرپرسی ئەکادیمیاکانی ئاپۆلۆ بۆ پێگەیاندنی گەریلا و ئەندامی ئەنجوومەنی پەکەکە/هەپەگە بووە و چالاکییە چەکدارییەکانی پەکەکەی بەڕێوەدەبرد لە ناوچەی دهۆک-گارە لە خاکی هەرێمی کوردستان و چەند گەریلایەکی دیکە، کرانە ئامانج. 

 

دێرسیم ماڵاتیا لە لیستی سووری داواکراوانی پەکەکەدا بووە. لە ساڵی 1992ـەوە پەیوەندیی بە پەکەکە کردووە و لە قەندیل و رۆژئاوا و باکوور ئەرک و بەرپرسیارێتیی هەبووە. لەدوای خەڵەف عەلی محەممەد ناسراو بە "سۆفی نورەددین" بووەتە بەرپرسی ئەکادیمیاکانی ئاپۆڵۆ بۆ پێگەیاندنی کادیری پەکەکە لە رووی ئایدۆلۆژیا و گەریلا لە رووی سەربازییەوە. 

 

تاوەکو ئێستا هێزەکانی پاراستنی گەل "هەپەگە" گیانلەدەستدانی ئەم بەرپرسەی پەکەکەی پشتڕاست نەکردووەتەوە. 

 

بەرەبەیانیی رۆژی 18ـی نیسانی 2022، ئۆپەراسیۆنی چنگ - قوفڵ لەلایەن سوپای تورکیا لە ناوچەکانی ئاڤاشین، مەتین و زاپ لە خاکی هەرێمی کوردستان لە دژی پەکەکە دەستیپێکرد. وەزارەتی بەرگریی تورکیا گیانلەدەستدانی 308 گەریلا و کوژرانی 38 سەربازی سوپای وڵاتەکەی راگەیاندووە. لە بەرامبەردا هەپەگە کوژرانی 1528 سەربازی تورکیا و گیانلەدەستدانی 72 گەریلا راگەیاندووە.