رووداو دیجیتاڵ
بوومەلەرزەیەک بە گوڕی 4.7 پلەی رێختەر شاری خۆی لە پارێزگای ورمێی رۆژهەڵاتی کوردستانی هەژاند.
رۆژی شەممە، 17ـی حوزەیرانی 2023 ناوەندی بوومەلەرزەزانیی کۆماری ئیسلامی ئێران رایگەیاند، کاژێر 16:00ی رۆژی شەممە بوومەلەرزەیەک بە گوڕی 4.7 پلەی ریختەر ناوەندی شاری خۆی پارێزگای ورمێی هەژاند.
بە گوێرەی ناوەندی بوومەلەرزەزانیی ئێران، لە ورمێ و ماکۆ و شووت و چەند شار و شارۆچکەیەکی دیکە هەست بە بوومەلەرزەکە کراوە.
تاوەکو ئێستا دیار نییە زیانەکانی ئەو بوومەلەرزەیە چی بوون و بە گوتەی زەبیحوڵڵا کازمی، قایمقامی خۆی، 25 تیمی بەرگریی شارستانی فریاکەوتنی تەندروستی لە ورمێ و شارەکانی دیکەی ئەو پارێزگایەوە رەوانەی خۆی کراون.
بەڕێوەبەرایەتیی مانگی سووری پارێزگای ورمێ لە راگەیێندراوێکدا دەڵێت، "تاوەکو ئێستا زیانەکانی ئەو بوومەلەرزەیە نەزانراون، بەڵام داوا لە هاووڵاتییان دەکەین دان بە خۆیاندا بگرن و خۆیان لەو شوێن و باڵەخانانە بەدوور بگرن کە ئەگەری داڕمانیان هەیە".
لە ماوەی هەشت مانگی رابردوودا شەش جار بوومەلەرزە شاری خۆی هەژاندووە و دوایین بوومەلەرزەش رۆژی 25ی نیسانی 2023 بە گوڕی 5.6 پلەی ریختەر روویدا.
ئەو بوومەلەرزانە هەزار و 127 کەسیان بریندار کرد و زیاتر لە 11 هەزار خانوو و باڵەخانەش زیانی گەورەیان پێ گەیشت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ