بەنداوێک لە مووش
رووداو دیجیتاڵ
بەهۆی تووانەوەی بەفری چیاکان ئاستی ئاوی دەریاچەکانی باکووری کوردستان، لەنێویاندا مووش، بەرزبووەتەوە و ئاوی بەنداو و زۆنگاوەکانی مووش سەرڕێژ بوون.
ماشەڵا ئەرگیون، جووتیاری باکووری کوردستان دەڵێت، "لەو بڕوایەداین ئەمساڵ خەندە دەگەڕێتەوە بۆ جووتیاران. بەرهەمێکی باشیان دەبێت، چونکە دەشتی مووش تاوەکو بڵێیت گونجاو و بە بەرهەمە. زۆر زۆریش پێویستمان بە ئاوە."
ئەمساڵ جگە لە جووتیاران، ئاژەڵدارانیش بە گوڕوتینەوە گەڕاونەتەوە سەر کارەکانیان و دەڵێن، دوای چەند ساڵێک لە کەمئاوی و وشکەساڵی، ئەمساڵ چاوەڕێی بەرهەمی باشن.
شێخموس یەنتور، سکرتێری گشتیی ئیدارەی تایبەتیی پارێزگای مووش دەڵێت، "رێژەی پڕبوون نزیکەی 100%. بەتایبەتی ئاوی ئەو بەفر و بارانەی لە ناوچەکەدا باریوە، جگە لەوەی سوودی زۆری بۆ زەوی و زار هەبووە، بە هەمان شێوە وایکردووە دەریاچە و بەنداوەکانیش پڕ ببن. ئەمە هەم بۆ جووتیاران و هەمیش بۆ ئاژەڵداران سوودی گەورەی هەیە."
لە چەند ساڵی رابردوودا ئاستی ئاوی بەنداو و زۆنگاوەکان زۆر نزم ببوو؛ ئەمساڵ بەهۆی توانەوەی بەفر و زۆربوونی ئاو لە ناوچەکە، بارتەقای 10 ملیۆن مەتر سێجا ئاو چووەتە نێو بەنداوە بچووکەکانەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ