وەزارەتی دارایی: داهاتی نانەوتیی مانگی شوباتمان بۆ بەغدا نارد

 

بڕی پارەکە (48،722،239،000) دینارە و بە شێوەی کاش خرایە سەر هەژماری بانکیی وەزارەتی دارایی حکومەتی فیدراڵ لە لقی هەولێری بانکی ناوەندیی عێراق.

 

رۆژی 12-03-2025، وەزارەتی دارایی عێراق، (957،925،880،078) دیناری بۆ مووچەی مانگی شوباتی مووچەخۆرانی هەرێمی کوردستان خەرج کرد. ئەو کات، وەزارەتی دارایی هەرێمی کوردستان رایگەیاند، هەمان ئەو بڕەیە کە خۆیان بۆ مووچەی مانگی شوبات داوایان کردبوو.

 

وەزارەتی دارایی پێشتر رایگەیاندووە، لەدوای (10)ـی هەموو مانگێک راپۆرتی تەرازووی پێداچوونەوەی مانگانە ئامادە دەکرێت.

 

دوایین جار وەزارەتی دارایی هەرێمی کوردستان زیاتر لە 51 ملیار دیناری وەکو داهاتی نانەوتیی مانگی یەک بۆ بەغدا نارد.

 

 

بەگوێرەی زانیارییەکانی رووداو، بەغدا داوای نزیکەی 90 ملیار دینار داهاتی نانەوتی لە هەرێمی کوردستان دەکات.

 

دوێنێ، سەرچاوەیەک لە وەزارەتی دارایی هەرێمی کوردستان بە رووداوی گوت، دەستیان بە ئامادەکردنی لیستی مووچەی مانگی سێ کردووە و ئەم هەفتەیە بۆ بەغدای دەنێرن.

 

باسی لەوەش کرد، لیستی مووچە وەکو خۆی دەبێت و هیچ گۆڕانکارییەک لە لیستەکە و شێوازی ناردنی ناکرێت.