رووداو دیجیتاڵ
ئەفسەرێکی کورد لەناو سوپای عێراق لە سنووری قەزای دووبز لەسەر بەرگریکردن لە جووتیارانی کوردی گوندی شەناغەی سنووری سەرگەڕان سزا دەدرێت.
سەرچاوەیەک لە سوپای عێراقی لە کەرکووک، ئەمڕۆ دووشەممە، 17-02-2025، بە تۆڕی میدیایی رووداوی راگەیاند، عەقید رێبەر مزووری، فەرماندەی فەوجی یەکی لیوای 32ی فرقەی هەشتی سوپای عێراق لەسەر بەرگریکردن لە جووتیارانی گوندی شەناغە سزادراوە.
گوندی شەناغە، دەکەوێتە ناحیەی سەرگەڕان لە قەزای دووبزی سنووری پارێزگای کەرکووک.
بەگوێرەی سەرچاوەکە، عەقید رێبەر مزووری، لەسەر خراپ مامەڵەکردن لەگەڵ جووتیارانی کورد، دوێنێ فەرماندەی سریەی پشتیوانی سوپای عێراقی، کە بەرپرس بووە لە گوندی شەناغە، سزای داوە و زیندانی کردووە.
بەڵام لەسەر ئەم هەڵوێستە، فەرماندەیی ئۆپەراسیۆنەکانی کەرکووک سزای ئەو ئەفسەرە کوردەی داوە و بڕیاری گواستنەوەی دەرکردووە و لیژنەی لێکۆڵینەوەی لەسەر پێکهێناوە.
عەقید رێبەر مزووری تاوەکو ئێستا لە شوێنی کارەکەی بەردەوامە.
بەڵام بڕیارە سبەی سێشەممە لیژنەی لێکۆڵینەوە لە فەرماندەیی ئۆپەراسیۆنە هاوبەشەکانی کەرکووکەوە بگاتە دووبز بۆ لێکۆڵینەوە لە عەقید رێبەر مزووری.
بەگوێرەی ئەو زانیارییانەی دەست تۆڕی میدیایی رووداو کەوتووە، لە هەرێمی کوردستانەوە، هاتوونەتە سەر هێڵ بۆ چارەسەرکردنی کێشەی ئەو ئەفسەرە کوردەی نێو سوپای عێراق و هەوڵەکان بەردەوامن.
جووتیارانی کورد لە سنووری کەرکووک رۆژێکی پڕ لە زەحمەتی و رووبەڕووبوونەوەیان لەگەڵ سوپای عێراق بەڕێکرد، سوپا رێگری لێکردن زەوییەکانیان بکێڵن، بەڵام ئەوان کۆڵیان نەدا، گرژی دروستبوو و سوپا ئازاری جووتیارانی دا.
رۆژی 21-01-2025 پڕۆژە یاسای گەڕاندنەوەی زەوی بۆ خاوەنەکانیان دەنگی لەسەردرا و بووە یاسا، بەڵام تاوەکو ئەمڕۆ رێکارەکانی ماون و نەچووەتە جێبەجێکردنەوە.
یاساکە تەنیا لە کەرکووک پەیوەندیی بە 300 هەزار دۆنم زەویی کورد و تورکمان هەیە. تایبەتە بە گەڕاندنەوەى موڵک و ماڵى ئەو کەسانەى کە بەگوێرەى هەشت بڕیارى ئەنجوومەنى سەرکردایەتیى شۆڕشى دەسەڵاتى پێشوو (بەعس) لێیان داگیرکرابوو.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ