کەسوکاری ئەو شۆفێرەی بە تانکەرێکەوە خۆی بە 7 ئۆتۆمبێلدا کێشا: ئامادەین قەرەبوویان بکەینەوە

 

تانکەرەکە زیانی بە حەوت ئۆتۆمبێل گەیاند و دوو کەسیش بە سووکی بریندار بوون.

 

مەلا ئەیووب، ژمێریاری ئەو دووکانەیە و لەبارەی رووداوەکە قسەی بۆ رووداو کرد، دەڵێ "تانکەرەکە هاتە ژوورەوە و خۆی بە 7 بۆ 8 ئۆتۆمبێلدا کێشا، زیانی بە دوو ئۆتۆمبێلی مەرزیە، دوو کیا و ئۆپڵێک گەیاند، هەرچەندە خەڵکی زۆر لێرە بوون، بەڵام سوپاس بۆ خوا زیانی گیانی نەبوو و، دوو کەس بریندارن ئەوانیش برینەکانیان سووکە.''

 

دوای نزیکەی کاژێر و نیوێک، توانرا تانکەرەکە لە دووکانەکە بهێنرێتە دەرەوە، کەسانی نزیکی شۆفێری تانکەرەکە دەڵێن، ئۆتۆمبێلەکە لەدەستی دەرچووە و هەرچی بکەوێتە ئەستۆی، ئەوان ئامادەن.

 

شوکر محەممەد ئەمین، ئامۆزای شۆفێرەکە بە رووداوی گوت "ئێمە ئامادەین قەرەبووی زیانلێکەوتووان بکەینەوە؛ چ بە کڕینی ئۆتۆمبێلەکان یان بە قەرەبووکردنەوەیان. سوپاس بۆ خوا هەموومان یەکتر دەناسین و ئەوەی لەدەستمان بێت، درێخیی لێ ناکەین."

 

بەپێی گوتەی خاوەنی ئۆتۆمبێلەکان و دووکانەکە، نزیکەی 15 هەزار دۆلار زیانییان بەرکەوتووە. یەکێک لە ئۆتۆمبێلەکان کەوتووەتە ژێر تانکەرەکە و بووەتە پارچەیەک ئاسن، خاوەنی ئۆتۆمبێلەکە دەڵێ "من و خێزانەکەم خولەکێک بوو لەنێو ئۆتۆمبێلەکە دەرچووبووین، بۆ ئەوەی کەلوپەل بکڕین." کاتێک رووداوەکە روویدا.