کوردستان
نێچیرڤان بارزانی، سه‌رۆكى هه‌رێمى كوردستان لەگەڵ ئامۆس هۆشتا‌ين، گه‌وره راوێژكارى جۆ بايدن، سه‌رۆكى ئه‌مريكا لە میونشن.
رووداو دیجیتاڵ
لە کۆنفرانسی ئاسایشی میونشن، سه‌رۆكى هه‌رێمى كوردستان لەگەڵ ئامۆس هۆشتاین، گه‌وره راوێژكارى جۆ بايدن، سه‌رۆكى ئه‌مريكا بۆ كاروبارى وزه و وه‌به‌رهێنان، كۆبووه‌وه.
بەگوێرەی راگەیێندراوێکی سەرۆکایەتیی هەرێمی کوردستان، له كۆبوونه‌وه‌كه‌دا په‌يوه‌ندييه‌كانى ئه‌مريكا له‌گه‌ڵ عێراق و هه‌رێمى كوردستان به‌تايبه‌تى له بوارى ئابوورى و هاريكاريى وزه و وه‌به‌رهێناندا، دوايين رێكار و هه‌نگاوه‌كان بۆ هه‌نارده‌كردنه‌وه‌ى نه‌وتى هه‌رێمى كوردستان و گفتوگۆى لايه‌نه په‌يوه‌نديداره‌كانى حكومه‌تى هه‌رێمى كوردستان و حكومه‌تى فيدراڵيى عێراق له‌مباره‌يه‌وه، باس كران.
هۆشتاین بەگوێرەی راگەیێندراوەکە باسى له‌وه كردووە، "ئه‌مريكا به بايه‌خ و گرنگييه‌وه ده‌ڕوانێته ئارامى و سه‌قامگيريى عێراق و هه‌رێمى كوردستان و ده‌خوازێت له كه‌رته‌كانى ئابوورى و وه‌به‌رهێنان و وزه‌دا، بره‌و به ده‌رفه‌ته‌كان و هاريكاريى هاوبه‌شيان بدات، هه‌روه‌ها پابه‌نديى ئه‌مريكاى به به‌رده‌واميى پشتگيرى و يارمه‌تيدانى عێراق و هه‌رێمى كوردستان، دووپات كرده‌وه".
وەک سەرۆکایەتیی هەرێمی کوردستان ئاماژەی پێداوە، تاوتوێكردنى په‌يوه‌ندييه‌كانى هه‌ولێر - به‌غدا، دۆخى ئه‌منيى عێراق و هه‌رێمى كوردستان و هه‌ڕه‌شه‌ى سه‌ر هێزه‌كانى هاوپه‌يمانان و ديپلۆماتكاران له عێراق و كاريگه‌ريى ئاڵۆزييه‌كانى رۆژهه‌ڵاتى نێوه‌ڕاست به‌گشتى، ته‌وه‌رێكى ديكه‌ى كۆبوونه‌وه‌كه بوو.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ