ئەنجوومەنی ئاسایشی هەرێمی کوردستان "چەند کەسێکی سەر بە پەکەکە" لە دهۆک دەستگیر دەکات

 

رۆژی سێشەممە 17-01-2023، ئەنجوومەنی ئاسایشی هەرێمی کوردستان دانپێدانانی "گرووپێکی سەر بە پەکەکە"ی بڵاوکردەوە و دەڵێت، لە رۆژی 06-01-2023 دەستگیرکراون و لە دوو کەس پێکهاتوون. 

 

وەک ئەنجوومەنەکە دەڵێت، "هێمن یوسف خزر" کە بە "هەڤاڵ ئاندۆق" ناسراوە و "ئەحمەد شەمۆ سەمیر" ناوی ئەو دوو دەستگیرکراوەن. 

 

لە دانپێدانانەکەدا هێمن یوسف خزر گوتی، "لە ساڵی 2016 پەیوەندیم بە پەکەکەوە کرد.. رۆژهات پێی گوتم، دەچیتەوە شێخان و وێنەم بۆ بگرە و بۆم بنێرە.. 

 

لە هەمان کاتدا دەستیان بەسەر "سێ بۆمبدا" گرتووە و "شۆفێری ئەو ئۆتۆمبێلەش دەستگیرکراوە کە بۆمبەکانی گواستووەتەوە." ئەمە بە گوتەی ئەنجوومەنی ئاسایشی هەرێمی کوردستان. 

 

ئەنجوومەنی ئاسایش دەڵێت، لە لێکۆڵینەوەکانیاندا دەرکەوتووە: "لە رێگەی بەرپرسێکی هەواڵگریی پەکەکە بە ناوی (ناجی حجی بدل) ناسراو بە (رۆژهات) راسپێردراون تاوەکو چاودێری ئۆتۆمبێلە سەربازیی و کەسایەتییە ئایینیی و کۆمەڵایەتی و سیاسییەکان بکەن بە مەبەستی ئەنجامدانی کردەوەی تیرۆریستی." 

 

ئەنجوومەنی ئاسایشی هەرێمی کوردستان دەڵێت: کەمپەکانی "شاریا، بێرسڤێ، کەبەرتوو و شێخان" لە پارێزگای دهۆک ئامانجی "کردەوە تیرۆریستییەکان بوون."