سەرۆکی لیستی پارتی لە کەرکووک رەتیدەکاتەوە دەستی لەکار کێشابێتەوە

 

رۆژی شەممە، 16ـی کانوونی یەکەمی 2023، حەسەن شێخانی، سەرۆکی لیستی پارتی دیموکراتی کوردستان لە کەرکووک بە هەردی محەممەد، پەیامنێری تۆڕی میدیایی رووداوی راگەیاند، "کاتێک هەواڵی وازهێنانی خۆم لە پارتی بیست حەپەسام، داوا لەو پەیجانە دەکەم کە ئەو جۆرە دەنگۆیانە بڵاودەکەنەوە، با بئاڵێن بە نەیارانی کوردەوە، لەبەرئەوەی شەڕی ئێستامان لە کەرکووک شەڕی خاکە و نابێ ببێتە شەڕی حیزبایەتی".

 

سەرۆکی لیستی 197ـی پارتی دیموکراتی کوردستان لە کەرکووک دەڵێت؛ "لە ماوەی بانگەشەی هەڵبژاردنی ئەنجوومەنی پارێزگا بە بەردەوامی داوام لە ئەندامانی لیستەکەمان کردووە، خۆیان تێکەڵ بە مشتومڕی حیزبی نەکەن، لەبەرئەوەی شەڕی ئێمە شەڕی سەلماندنەوەی کوردە لە کەرکووک".

 

حەسەن شێخانی دەشڵێت؛ "ئەو دەنگۆیەی لەسەر وازهێنانم بڵاوکراوەتەوە، دوورە لە راستییەوە، ماوەی 35 ساڵی تەمەنم لە خزمەتی پارتیدا بووم و ئەو تەمەنەی ماویشمە هەر لەو رێگەیەدا دەبم، بۆیە داوا لە خەڵک دەکەم رۆژی 18ـی مانگ بچنە سەر سندووقەکانی دەنگدان بۆ ئەوەی بتوانین وەکو کورد بوونی خۆمان لە کەرکووک بسەلمێنینەوە".

 

ئەمڕۆ دەنگدانی تایبەت بە ئەنجوومەنی پارێزگاکانی عێراق بەڕێوەچوو و بڕیارە رۆژی 18ـی کانوونی دووەم دەنگدانی گشتی لە سەرجەم پارێزگاکانی عێراق، جگە لە هەرێمی کوردستان بەڕێوەبچێت.