نێچیرڤان بارزانی بۆ لایەنە سیاسییەکان: گفتوگۆیەکی بەرپرسیارانە بۆ پێکهێنانی حکومەتێکی کارا بکەن
رووداو دیجیتاڵ
سەرۆکی هەرێمی کوردستان دەڵێت، پێویستە کێشەکانی نێوان هەولێر و بەغدا لەسەر بنەمای دەستوور و رێککەوتنەکان چارەسەر بکرێن؛ ئاماژە بەوەش دەکات، ''ئەرکی عێراقە لە هەموو بوارێکەوە پشتگیریی بەهێزکردنی هێزی پیشمەرگە بکات.''
ئەمڕۆ شەممە 16-11-2024، نێچیرڤان بارزانی، سەرۆکی هەرێمی کوردستان لە رێوڕەسمی دەرچوونی خوێندکارانی خولی چوارەمی پێگەیاندنی ئەفسەران لە کۆلێژی قەڵاچوالان لە پارێزگای سلێمانی گوتارێکی پێشکێشکرد و رایگەیاند، ''جێگەی شانازی و خۆشحاڵییەکی زۆری هەموومانە، لە سایەی ئەم دامەزراوە سەربازییە پێشکەتووەدا، بەشداری لە ئاهەنگی دەرچوونی پۆلێکی نوێی پارێزەرانی نیشتمان و بەشێکی گرنگ و سەرەکی لە دروستکەرانی داهاتووی گەشی کوردستان و عێراق دەکەین''.
لە رێوەڕەسمەکەدا 769 ئەفسەر بڕوانامەی دەرچوونیان وەرگرت. نێچیرڤان بارزانی گوتی، ''ئەوەی زیاتر جێگەی دڵخۆشییە ئەوەیە کە 48ـیان خانمن. ئافرەتانی کوردستان بە درێژایی مێژووی خەباتی گەلەکەمان سەلماندوویانە کە هاوبەشی سەرەکی و کاریگەرن لە بنیاتنانی نیشتمان و بەرگیکردن لە خاک و وڵات.''
سەرۆکی هەرێمی کوردستان گوتی، بوونی ژن لە دامەزراوەی سەربازی و ئەمنیدا تەنیا نیشانەی پیشکەوتنی گەل و کۆمەڵگە نییە، ''بەڵکو بەڵگەیەکە بۆ باوەڕی قووڵی ئێمە بە یەکسانی، دادپەروەری و هاوبەشیی راستەقینە، لە هەڵگرتنی بەرپرسیارێتیی نیشتمانی و ئەرکە گرنگەکاندا.''
نێچیرڤان بارزانی رایگەیاند، ''لە هەرێمی کوردستان باوەڕێکی قووڵمان بەوە هەیە کە پێویستە پێشمەرگە و هێزە چەکدارەکانمان دامەزراوەی نیشتمانی و پیشەیی سەربەخۆ بن، دوور بن لە هەموو جۆرە ناکۆکی و ململانێیەکی سیاسی و حیزبی. ئەم هێزە دەبێ سەر بە نیشتمان و سەر بە گەلی کوردستان بێت، بە هەموو پێکهاتە جیاوازەکانی کوردستانەوە''.
سەرۆکی هەرێمی کوردستان جەختی لەوە کردەوە کە هێزی پێشمەرگە بەشێکی گرنگ و سەرەکییە لە سیستمی بەرگریی عێراق و گوتی، ''بۆیە ئەرکی عێراقە لە هەموو روویەکەوە، پشتگیریی بەهێزکردنی پیشمەرگە بکات''.
پێشمەرگە لە بەرەنگاربوونەوە و شەڕ دژی داعشدا هاوپەیمانێکی سەرەکیی هێزەکانی هاوپەیمانانە. نێچیرڤان بارزانی رایگەیاند، ''پێشمەرگە لەم بوارەوە سەلماندوویەتی لە ئاستی بەرپرسیارێتیی مێژوویی و نیشتمانیدایە" و گوتیشی، ''[لە شەڕی دژی داعش] خوێنی پێشمەرگە لە هەموو شوێنێکی کوردستاندا تێکەڵ بوو، هیچ کەسێک پرسیاری نەدەکرد کامە سەوزە و کامە زەردە، هەموویان لەپێناو خزمەتکردن بە وڵات و لەپێناو خزمەتکردن بە کوردستان خوێنیان بەخشی و خەباتیان کرد.''
سەرۆکی هەرێمی کوردستان هۆشداری دەدات کە لە عێراق بەگشتی مەترسیی تیرۆر و چەکدارانی داعش تاوەکو ئێستاش مەترسییەکی راستەقینەیە و ''جەخت لە گرنگیی بەردەوامیی هاوئاهەنگی و هاوکاریی هاوبەشی پێشمەرگە، سوپای عێراق و هێزەکانی هاوپەیمانان دەکەینەوە.''
وەک پشتیوانییەک بۆ پێشمەرگە و یەکخستنەوەی هێزەکانی پێشمەرگە، هاوپەیمانان مانگانە نزیکەی 25 ملیۆن دۆلار دەدەنە وەزارەتی پێشمەرگە. نێچیرڤان بارزانی دەستخۆشی لە هێزەکانی هاوپەیمانان دەکات کە ''پشتگیری و هاوکاریی بەردەوامیان بۆ عێراق و هەرێمی کوردستان هەبووە و هەوڵیان بۆ یەکخستنەوە و چاکسازیی هێزەکانی پێشمەرگە داوە.''
لەبارەی پڕۆسەی چاکسازیی وەزارەتی پێشمەرگەوە سەرۆکی هەرێمی کوردستان دەڵێت، ''راستە لەم قۆناخەدا کێشە و گرفت لە بەردەم پڕۆسەکەدا هەن، راستە هەنگاوەکان بە سستی (هێواشی) دەنرێن، بەڵام بەرەوپێشچوونێکی باش هەیە، ئیرادە و خواستی جیدیمان هەیە. تاوەکو سەرکەوتن و یەکخستنەوەی پێشمەرگە کۆڵ نادەین و بەردەوام دەبین.''
نێچیرڤان بارزانی ئاماژەی بە گرژییەکانی ناوچەکە کرد و گوتی، ''کێشە و ئاڵۆزییەکانی رۆژهەڵاتی نێوەڕاست هەڕەشە لە ئاسایش و سەقامگیریی هەرێمی کوردستان، عێراق و بەگشتی ناوچەکە دەکەن.''
سەرۆکی هەرێمی کوردستان جەختی لەوە کردەوە، پێوستە عێراق دوور بێت لە ململانێ و کێشە هەرێمییەکان و ئاماژەی بەوەشکرد، ''عێراق پێویستی بە ئارامی، سەقامگیری و گەشەپێدانی بەردەوامە، نەوەک تەنگژە، ناکۆکی و ململانێی زیاتر" و دووپاتی کردەوە، ''هەرێمی کوردستان وەک فاکتەری ئارامی لە ناوچەکەدا دەمێنێتەوە و دەستی هاوکاری بۆ هەموولایەک درێژ دەکات، لەپێناو پاراستنی ئارامی، سەقامگیری و پێکەوەژیانی ئاشتییانەی هەمووان.''
سەرۆکی هەرێمی کوردستان دیالۆگ، لێکتێگەیشتن و دانوستاندنی بەردەوام بە ''تەنیا رێگەی گونجاو'' دەزانێت بۆ چارەسەرکردنی ناکۆکی و گرژییەکان.''
لەبارەی پێکهێنانی کابینەی 10ـەمی حکومەتی هەرێمی کوردستان، نێچیرڤان بارزانی داوای لە هێزە سیاسییە براوەکان کرد کە ''بەرژەوەندیی باڵای نیشتمانی لە سەرووی هەموو شتێکەوە دابنێن و گفتوگۆیەکی جیدیی بەرپرسیارانە و بنیاتنەرانە دەستپێبکەن بۆ پێکهێنانی حکومەتێکی بەهێز و کارا؛ حکومەتێک کە وەڵامدەری چاوەڕوانییەکانی خەڵک بێت و بتوانێت سەرکەوتووانە رووبەڕووی مەترسی و ئاڵنگارییەکانی ئیستا و داهاتوو ببێتەوە.''
نێچیرڤان بارزانی جەختی لە پێویستی و گرنگیی چارەسەرکردنی کێشەکانی هەولێر و بەغدا ''لەسەر بنەمای دەستوور و رێککەوتنە سیاسییەکانی هەرێمی کوردستان و عێراق'' کردەوە.
چەند پەیامی گرنگ لە نێچیرڤان بارزانییەوە:
- لایەنە سیاسییەکان گفتوگۆیەکی بەرپرسیارانە بۆ پێکهێنانی حکومەتێکی کارا بکەن کە وەڵامگۆی داخوازییەکانی خەڵک بێت
- جەخت لەسەر پێویستی و گرنگیی چارەسەرکردنی کێشەکانی هەرێمی کوردستان و بەغدا لەسەر بنەمای دەستوور دەکەمەوە.
- هەرێمی کوردستان بە فاکتەری ئارامی لە ناوچەکە دا دەمێنێتەوە و دەستی هاوکاری بۆ هەموو لایەنێک درێژ دەکات.
- دڵنیاتان دەکەینەوە کە تا سەرکەوتن و یەکخستنەوەی هێزی پێشمەرگە کۆڵنادەین.
- لە شەڕی دژی داعش خوێنی پێشمەرگە لە هەموو شوێنێکی هەرێمی کوردستان تێکەڵ بوو. کەس پرسیاری نەدەکرد کامە سەوزە و کامە زەردە.
- ئەرکی عێراقە لە هەموو روویەکەوە پشگیریی بەهێزکردنی پێشمەرگە بکات.
- پێویستە پێشمەرگە و هێزە چەکدارەکانمان دامەزراوەیەکی نیشتمانی و پیشەیی سەربەخۆ بن.
دەقی گوتارەکەی نێچیرڤان بارزانی:
دەرچووانی خۆشەویست،
دایكوباوك كه‌سوكاری ئازیزی ده‌رچووان،
ئاماده‌بووانى به‌ڕێز..
رۆژتان باش..
هه‌موو لايه‌كتان به خێر بێن بۆ ڕێوڕه‌سمى ده‌رچوونى خولى چواره‌مى پێگه‌ياندنى ئه‌فسه‌ران له كۆلێژى سه‌ربازيى قه‌ڵاچوالان.
به‌خێرهاتنێكی تایبه‌تیی شاناز خان، خاتوونی یه‌كه‌می عێراق ده‌كه‌م كه له‌م ڕێوڕه‌سمه‌دا له‌گه‌ڵ ئێمه به‌شداره، زۆر به‌خێر بێت.
جێى شانازى و خۆشحاڵييه‌كى زۆرى هه‌موومانه، لە سايه‌ى ئەم دامەزراوە سەربازییە پێشكه‌وتووه‌دا، بەشداری له ئاهەنگی دەرچوونی پۆلێکی نوێی پارێزەرانی نیشتمان و به‌شێكى گرنگ و سه‌ره‌كى له دروستکەرانی داهاتووی گەشی کوردستان و عیراق، ده‌كه‌ين. ئەمڕۆ ڕۆژێکی تايبه‌ته بۆ هەرێمی کوردستان و بۆ عێراق، کە بەرهەمی ماندووبوون و ڕه‌نجى گەورەی دەرچووان و مامۆستایانی بەڕێزیان، دەبینین.
زۆر خۆشحاڵم كه ده‌بينم (769) گه‌نجى وڵاته‌كه‌مان، به گوڕوتينێكى نوێوه، چه‌كدار به زانست و ديسپلينى سه‌ربازى، له‌م كۆلێژه به توانايه ده‌رده‌چن. ئه‌وه‌ى زياتر بۆ هه‌موومان مايه‌ى خۆشحاڵى و شانازييه، ئه‌وه‌یه كه (48) ده‌رچووان له‌وانه‌ی كه ئه‌مڕۆ ده‌رچوون، خانمن. ئه‌وان، ئێستا، دواى نۆ مانگ خوێندن و ڕاهێنان ده‌رده‌چن و پله‌ى مولازم وه‌رده‌گرن. خوێنێكى نوێ به به‌ر هێزى پێشمه‌رگه‌ى كوردستاندا ده‌كه‌ن. دڵنياين، ئێستا كه خه‌ڵكى كوردستان ئه‌م ديمه‌نانه ده‌بينن، به شانازييه‌وه، هه‌ست به سه‌ربه‌رزى ده‌كه‌ن.
له دڵه‌وه، گەرمترین پیرۆزبایی و دەستخۆشی پێشکەش بە دەرچووانی ئازیز و خێزانه‌كانيان دەکەم کە لە ته‌واوی ڕێگای خوێندن و ڕاهێنانیاندا، پاڵپشت و هاندەریان بوون. هەروەها، سوپاس و پێزانینی تایبەت و بێپایانی خۆم پێشکەش بە مامۆستايانى دڵسۆز و ماندوونەناس و به‌رپرسانى کۆلێژی سەربازی دەکەم، بۆ هەوڵى بەردەوام و بێوچانیان لە ئامادەکردن و پێگەیاندنی ئەم نەوە ئومێدبه‌خشه و دڵسۆزه بۆ كوردستان و عێراق.
دەرچووانی خۆشەویست و ئازیز،
خواست و بژارده‌ى ئێوە بۆ په‌يوه‌نديكردن بە کۆلێژی سەربازييه‌وه، دوای تەواوکردنی خوێندنی زانکۆ، نیشانەی دڵسۆزى و پێگەیشتنی فیکری و هەستی قووڵى نیشتمانى و بەرپرسیارێتيی بەرزى ئێوه‌يه. ئێوە ڕێگای ئاسانتان هەڵنەبژاردووە، بەڵکو ڕێگایه‌كی سه‌ختى شکۆ و سەربەرزیتان هەڵبژاردووە كه ڕێگای خزمەتكردنی نیشتمان و پاراستنی دەستکەوت و بەها باڵاكانى گەلەکەمانه.
خوێندن و پێشینەی ئەکادیمی و پسپۆڕیی زانستیتان، سەرمایەیەکی زۆر گەورەیە له ژیانتاندا. بێگومان، هێزە چەکدارەکانمان دەوڵەمەند دەکات. توانا و لێهاتوویيیان، بۆ ڕووبەڕووبوونەوەی ئاڵنگارییەکانی سەردەم و داهاتوو، بەهێزتر و بەرزتر دەکاتەوە. ئەمە سەرەتای وەرچەرخانێکی گرنگ و پێويستە، لە مێژووی پێشمه‌رگايه‌تى و هێزە چەکدارەکانی هەرێمی کوردستاندا.
بە تایبەتی و بە شانازییەکی زۆرەوە، بەشداريی كچان و ژنانی کوردستانی لە ڕیزەکانی پێشمه‌رگه و هێزە چەکدارەکانمان، له‌م ڕۆژه‌دا بەرز دەنرخێنم. ئافره‌تانى کوردستان، بە درێژایيی مێژووی خەباتی گەلەکەمان، سەلماندوویانه کە هاوبەشی سەرەکی و کاریگەرن لە بنیاتنانی نیشتمان و بەرگریکردن لە خاک و وڵات.
له‌مپێناوه‌دا، قوربانيى زۆريان داوه كه مايه‌ى ڕێز و شانازين. بوونى ژن لە دامەزراوەی سەربازى و ئه‌منیدا، تەنها نیشانەی پێشکەوتنی کۆمەڵگاکەمان نییە، بەڵکو بەڵگەی باوەڕی قووڵی ئێمەیە بە یەکسانی و دادپەروەری و هاوبەشيی ڕاستەقینە، لە هەڵگرتنی بەرپرسیارێتيی نیشتمانی و ئه‌ركه گرنگەکاندا.
مێژووی پێشمەرگە، تۆمارێکی زێڕین و پڕ شانازییە لە قارەمانێتی، فیداکاری و قوربانیدان له‌پێناو كوردستان. لە ڕۆژی دامەزراندنییەوە تا ئەمڕۆ، پێشمه‌رگه، ئەم هێزە شكۆداره، بەردەوام قەڵغانێکی پۆڵایین و پتەو بووە، بۆ پاراستنی كوردستان و ده‌سكه‌وته‌كانی. بە درێژایيی دەیان ساڵی ڕابردوو، شەڕی بەرگریکردن لە ئازادی، مافە ڕەواکان و شكۆى گەلى كوردستانيان کردووە. کاروانێکی درێژی شەهیدانی سەربەرز و قارەمانیان پێشکەش به كوردستان کردووە. ئەمڕۆش بە هەمان گیانی نیشتمانپەروەری و فیداکارییەوە، لە پاراستنی دەستکەوتە دیموکراسی و دەستوورییەکانی گەلەکەمان، بەردەوامن و كۆڵ ناده‌ن.
له‌م ڕۆژه‌دا سه‌ری ڕێز و نه‌وازش بۆ هه‌موو ئه‌و شه‌هیدانه داده‌نوێنین كه له‌پێناو به‌رگریكرن له كوردستان و ده‌سكه‌وته‌كانیدا، خوێنی خۆیان به‌خشی، هه‌میشه یادیان به زیندوویی ده‌مێنێته‌وه.
ده‌رچووانى ئازيز،
کچان و کوڕانی خۆشه‌ويست،
دەرچوونی ئەمڕۆتان کۆتایيی ڕێگا نییە، بەڵکو سەرەتای قۆناغێکی نوێ و گرنگى ژیانتانه. سەرەتای ڕێگایەکی پڕ لە بەخشین، له قوربانی و خزمەتکردن بە گەل و نیشتمان. ئەو زانست و زانیاری و ئەزموونانەی کە لەم کۆلێژە ڕه‌سه‌نه‌دا بەدەستتان هێناوە، چەک و ئامرازێکی بەهێزن، بۆ خزمەتکردنی نیشتمان و گەلەکەتان. بەشدارى و په‌يوه‌نديكردنتان بە دامەزراوەی سەربازیيه‌وه، بەرپرسیارێتییەکی مێژوویی و نیشتمانيی گەورە، دەخاتە سەر شانتان بۆ پاراستنی ئاسایش، ئارامی و سەقامگیريی وڵاته‌كه‌مان. هه‌ر له‌م ڕۆژه‌دا یادی سه‌رۆك مام جه‌لال به‌رز ده‌نرخێنین كه له ساڵی 1992ه‌وه بیری له‌وه كردۆته‌وه تا ئه‌م كۆلێژه سه‌ربازییه دابمه‌زرێت له‌پێناو خزمه‌تكردنی كوردستان، له‌پێناو خزمه‌تكردنی وڵاتدا.
ئێمە لە هەرێمی کوردستان باوەڕێکی قووڵ و پتەومان هەیە کە پێشمه‌رگه و هێزە چەکدارەکانمان، دەبێت و پێویسته دامەزراوەیەکی نیشتمانی و پیشەیيی سەربەخۆ بن. دوور بن لە هەموو جۆرە ناكۆكى و ململانێی سیاسی و حزبی. ئەم هێزانە، ده‌بێ سەر بە نیشتمان و سه‌ر به گەلی کوردستان بن، بە هەموو پێکهاتە جیاوازه‌كانی كوردستانه‌وه.
هەروەها پێشمه‌رگه بەشێکی گرنگ و سەرەکین لە سیستەمی بەرگريی عێراقی. بۆيه ئه‌ركى عێراقه، له هه‌موو ڕوويه‌كه‌وه پشتگيری بكات بۆ به‌هێزكردنی پێشمه‌رگه. ئێمە بە شێوەیەکی بەردەوام و جددی، کار دەکەین بۆ بەهێزکردنی توانا و پەرەپێدانی کارامەیی و لێهاتوویيی پێشمه‌رگه، بۆ ئەوەی بتوانن بە باشترین شێوە، ڕووبەڕووی هەموو ئاڵنگاری و هەڕەشەیەک ببنەوە و وه‌ك هه‌ميشه قه‌ڵغانى پۆڵايينى پاراستنى كوردستان بن.
پێشمه‌رگه قاره‌مانه‌كانى كوردستان و هێزەکانمان لە شەڕی دژەتیرۆر و بەرەنگاربوونەوەی ڕێکخراوی تیرۆریستيی داعشدا، بە کردەوە و به خوێنی خۆیان سەلماندیان کە لە ئاستی بەرپرسیارێتيی مێژوویی و نیشتمانیدان. خوێنی پێشمه‌رگه له هه‌موو شوێنێكی كوردستاندا تێكه‌ڵ بوو، یه‌ك كه‌س پرسیاری نه‌ده‌كرد كامه سه‌وزه، كامه زه‌رده، هه‌موویان له‌پێناو خزمه‌تكردن به وڵات و له‌پێناو خزمه‌تكردن به كوردستاندا خوێنیان به‌خشی، فیداكارییان كرد و خه‌باتیان كرد. نموونەیەکی باش و بێوێنەیان پێشکەش کرد، لە قاره‌مانێتى، پیشەگەری، ئازایەتی، گیانی قوربانیدان و فیداکاری بۆ وڵات. له‌م قۆناغه‌شدا كه هێشتا تيرۆر و توندڕه‌وى، هه‌ڕه‌شه‌ى ڕاسته‌قينه‌ن، جه‌خت له گرنگيى به‌رده‌واميى هه‌ماهه‌نگى و هاريكاريى هاوبه‌شى پێشمه‌رگه و سوپاى عێراق و هێزه‌كانى هاوپه‌يمانان ده‌كه‌ينه‌وه.
هه‌روه‌ها پێویستە له‌م ڕۆژه‌دا سوپاس و پێزانینی قووڵی خۆمان دووپات بكه‌ينه‌وه بۆ هێزەکانی هاوپەیمانيی نێودەوڵەتيی دژى داعش، بۆ پشتگیری و هاوکاريی بەردەوامیان بۆ عێراق و هەرێمی کوردستان. پێزانینی تایبەتمان هەیە بۆ يارمه‌تيدان و پشتگیریيان لە هەوڵەکانی چاکسازی و یەکخستنه‌وه‌ى پێشمه‌رگه لەژێر چەتری وەزارەتی پێشمەرگەى حكوومه‌تى هه‌رێمى كوردستاندا بۆ ئه‌وه‌ی ببن به هێزێكی نیشتمانی و پارێزه‌ری ده‌ستكه‌وته‌كانی هه‌رێمی كوردستان بن به هه‌موو پێكهاته‌كانییه‌وه.
ڕاسته له‌م قۆناغه و له‌م ڕێگه‌یه‌دا كێشه و گرفت له‌به‌رده‌م پرۆسه‌كه‌دا هه‌ن، به‌ڵام وێڕاى هه‌موو شتێك، هه‌نگاوه‌كان ڕاسته هێواشن، به‌ڵام به‌ره‌وپێشچوونێكی باش هه‌یه. هه‌ر لێره‌شه‌وه، گه‌لى كوردستان و دۆستانمان له هاوپه‌يمانيى نێوده‌وڵه‌تى دڵنيا ده‌كه‌ينه‌وه كه ئيراده و خواستى جدييمان هه‌يه و تا سه‌ركه‌وتن و يه‌كخستنى پێشمه‌رگه، كۆڵ ناده‌ين و به‌رده‌وام ده‌بين.
خوشک و برایانی بەڕێز،
كێشه و ئاڵۆزييه‌كانى ڕۆژهەڵاتی ناوەڕاست، هەڕەشە لە ئاسایش و سەقامگیريی عێراق و هەرێمی كوردستان و ناوچه‌كه به‌گشتى دەکه‌ن. ئێمە لە هەرێمی کوردستان، جەخت لەسەر پێویستيی دوورخستنەوەی عێراق لە ململانێ و کێشە هەرێمییەکان دەکەینەوە. عێراق پێویستی بە ئارامی، سەقامگیری و گەشەپێدانی بەردەوامە، نەک تەنگژە و ناکۆکی و ململانێى زياتر.
دواى مێژوويه‌كى پڕ له ئازار، پڕ له مه‌ينه‌تى و وێرانكارى، به ده‌ستى جه‌نگ و شه‌ڕه يه‌ك له‌دواى يه‌كه‌كانه‌وه، عێراق ئێستا پێويستی به ئارامى و سه‌قامگيرى هه‌يه. بۆ ئه‌وه‌ى بتوانێت خێروبێر و ده‌وڵه‌مه‌نديى وڵاته‌كه‌يان، بۆ بنياتنانه‌وه و گه‌شه‌پێدان و پێشخستنى هه‌موو كه‌رته‌كانى ژيان، به‌كار بهێنێت. خه‌ڵكى عێراق و هه‌رێمى كوردستان، به هه‌موو ناوچه‌كانيانه‌وه، شايانى ژيان و خزمه‌تگوزاريى زياترن، نه‌ك تێوه‌گلان له ئاڵۆزى و ئاشووبه‌كان كه ئه‌مڕۆ له ناوچه‌كه‌دا هه‌ن.
لێره‌وه، دووپاتى ده‌كه‌ينه‌وه كه هه‌رێمى كوردستان، به فاكته‌رى ئارامى له ناوچه‌كه‌دا ده‌مێنێته‌وه و ده‌ستى هاريكارى بۆ هه‌موو لايه‌ك درێژ ده‌كات، له‌پێناو پاراستنى ئارامى و سه‌قامگيرى و پێكه‌وه‌ژيانى ئاشتييانه‌ى هه‌مووان.
ئەزموونی دەیان ساڵەی ئێمە لە هەرێمی کوردستان، فێری کردووین کە دیالۆگ، لێکگەیشتن و دانوستانی بەردەوام، تەنها ڕێگەی گونجاو و دروستن بۆ چارەسەرکردنی ناکۆکییەکان و تێپەڕاندنی قەیرانەکان. ئێمە باوەڕمان وایە کە پته‌وكردنی هاوکاری و هەماهەنگی لەنێوان هەموو پێکهاتەکانی عێراقدا، گەرەنتيی ڕاستەقینەن بۆ بنیاتنانی عێراقێکی دیموکراتی فیدراڵ کە ڕێز لە فرەیی و جیاوازییەکان بگرێت و ماف و ئازادییەکانی هەموو پێکهاتەکان بپارێزێت.
به‌ڕێزان،
به ڕه‌چاوكردنى قۆناغی سیاسيی هەستیاری دوای هەڵبژاردنى په‌رله‌مانى كوردستان كه هه‌ڵبژاردنێكی سه‌ركه‌وتوو بوو، نزیكه‌ی حه‌فتا و دوو له سه‌دی گه‌لی كوردستان به‌شدارییان له‌و هه‌ڵبژاردنه‌دا كرد كه به هه‌موو پێوه‌رێك سه‌ركه‌وتنی كوردستان بوو، داوا لە هەموو هێزە سیاسییە براوەکان دەکەم کە بەرژەوەنديی باڵای نیشتمان لە سەرووی هەموو شتێكه‌وه دابنێن. گفتوگۆيه‌كى جددی، بەرپرسیارانە و بنیاتنەر دەست پێبکەن، بۆ پێکهێنانی حکوومەتێکی بەهێز و کارا. حكوومه‌تێك کە وه‌ڵامگۆى چاوه‌ڕوانييه‌كانى خه‌ڵك بێت. بتوانێت سەرکەوتووانه ڕووبەڕووی مه‌ترسى و ئاڵنگارییەكانى ئێستا و داهاتوو ببێتەوە.
هەروەها جەخت لەسەر پێويستى و گرنگيی چارەسەرکردنی کێشه‌كانى هه‌رێمی كوردستان و به‌غدا لەسەر بنەمای دەستوور و ڕێککەوتنه سياسييه‌كانی هه‌رێمی كوردستان و به‌غدا دەکەمه‌وه. عێراقێك كه بتوانێت به‌رگه‌ى مه‌ترسييه‌كانى دۆخى ئاڵۆزى ناوچه‌كه بگرێت، پێويسته بێ جياوازى، عێراقى هه‌موو پێكهاته‌كان بێت. عێراقیێك كه بتوانێت له‌ڕووی كرده‌یییه‌وه بۆ هه‌موو عێراقییه‌كان بێت، هه‌مووان هه‌ست بكه‌ن له بڕياردان و به‌ڕێوه‌بردنى سياسى و كارگێڕيى وڵاتدا، هه‌م له هه‌رێمی كوردستان و هه‌م له عێراقیشدا وه‌ك يه‌ك، به‌شدار و هاوبه‌شن و خۆيان به خاوه‌نى عێراق بزانن.
جارێکی تر له دڵمه‌وه، پیرۆزبایی له دەرچووان و خێزان و كه‌سوكارى بەڕێزیان دەکەم. سوپاس و پێزانینی تایبەت، بۆ فه‌رمانده و به‌رپرسانى کۆلێژی سەربازيی قه‌ڵاچوالان و هەموو یه‌ك به یه‌ك مامۆستایان و ڕاهێنەران، بۆ هەوڵى دڵسۆزانەیان و ماندووبوونی بەردەوامیان، لە ئامادەکردنی ئەم نەوە نیشتمانپەروەرە كه ئومێدی كوردستان و داهاتووی وڵاته‌كه‌مانن.
هيوادارم هه‌موو لايه‌كتان سەرکەوتوو بن لە خزمەتکردنی نیشتمان و گەلەکەمان. له پاراستنى ته‌بايى و پێكه‌وه‌يى، له بره‌ودان به كولتوورى جوانى يه‌كترقبووڵكردن و پێكه‌وه‌ژيان و لێبورده‌يى له كوردستانی عێراقدا كه ته‌نها ئه‌وه ڕێگه‌مانه بۆ داهاتوو. خواى مه‌زن وڵاته‌كه‌مان بپارێزێت.
سڵاو و دروود له گيانى پاكى شه‌هيدان.
سڵاو له ئێوه و هيواى ڕۆژێكى خۆشتان بۆ ده‌خوام،
هه‌موولایه‌كتان به‌خێر بێن، زۆر سوپاس..