رێکخراوی کاری نێودەوڵەتی: رێژەی بێکاری لە هەرێمی کوردستان گەیشتووەتە 18%

 

سەرهەنگ مەلا محەممەد، باوکی شەش کچی دەرچووی زانکۆ بە رووداوی گوت، "کچ ئەگەر دامەزرا یان تەعین بوو و، مووچەیەکی هەبوو، مووچەکە بە کەڵکی دێت، چونکە لەم وڵاتەی ئێمە پیاوسالارییە و زۆر ستەم لە ئافرەت دەکرێت". 

 

رێکخراوی کاری نێودەوڵەتی لە دوایین راپۆرتیدا رایگەیاند کە رێژەی بێکاری لە هەرێمی کوردستان 18٪ـە. وەزیری خوێندنی باڵای حکومەتی هەرێمی کوردستان دان بەوەدا دەنێت کە ئەو سیستمە تەقلیدییەی خوێندن ناتوانێت بازاڕی کار پڕبکاتەوە.

 

د. ئارام محەممەد، وەزیری خوێندنی باڵای هەرێمی کوردستان دەڵێت، "زۆر پیشەی تازە دروستبوون کە ئیتر ئەو سیستمە تەقلیدییەی خوێندن ناتوانێت سکێل بۆ ئەم پیشانە دروست بکات. دەبێ بە سیستمێکی تازە ئەم توانایە لە خوێندکارانی خۆماندا دروست بکەین".

 

بەپێی ئاماری وەزارەتی خوێندنی باڵای حکومەتی هەرێمی کوردستان، ساڵ لەدوای ساڵ ژمارەی خوێندکاران لە زانکۆ و پەیمانگەکان زیاد دەبن. لە ساڵی 2007 زیاتر لە 54 هەزار خوێندکار لە زانکۆ و پەیمانگەکان وەرگیراون، بەڵام ئەمساڵ ئەو ژمارەیە بۆ نزیکەی 150 هەزار خوێندکار بەرزبووەتەوە، ئەمە سەرباری ئەوەی دامەزراندن لە کەرتی گشتی راگیراوە.

 

شێخ محەممەد، خاوەنی کۆمپانیایەکە و بە رووداوی گوت، "تەماشای دەکەم دەبینم زۆر باوەڕی بەخۆی نییە، ئەمە ناتوانم وەریبگرم، بەڵام کەسێکی دیکە هاتووە زۆر بەسیقەوە و زۆر باوەڕی بەخۆیەتی و هاتووە وادەکات سەرنجی خاوەن کار رادەکێشێت کە ئەمە زۆر گرنگە." 

 

تاوەکو ئێستا بەڕوونی دیار نییە پلانی حکومەت بۆ کەمکردنەوەی بێکاری و رەخساندنی هەلیکار بۆ دەرچووانی زانکۆ و پەیمانگەکان چییە، بەڵام ئەوەی روونە بۆ رەخساندنی هەلی کار لە 20ی ئەیلوول لە کۆبوونەوەی ئەنجوومەنی وەزیران بڕیاردرا، خاوەنکار لە پیشە و پڕۆژەکانی بازاڕ و کەرتی تایبەت و پڕۆژە هاوبەشەکانی نێوان کەرتی گشتی و کەرتی تایبەت پێشینە بە هاونیشتمانییانی هەرێمی کوردستان بدات بەشێوەی گشتی، بە جۆرێک لانیکەم 75٪ی دەستی کار لە پڕۆژەکان بۆ هاونیشتمانییانی هەرێمی کوردستان بێت و نابێت بیانی 25٪ زیاتر بێت.