لە لوڕستان سێ کەس بە رووداوی هاتووچۆ گیانیان لەدەستدا

 

 

ئێوارەی دوێنێ پێنجشەممە، 15-08-2024، بەهۆی پێکدادانی بارهەڵگرێک و دوو ئۆتۆمبێلی تایبەت لەسەر رێگەی زانووگە-ئیسلامئاوای سەر بە پارێزگای لوڕستانی رۆژهەڵاتی کوردستان، کە دەکەوێتە سنووری شاری کۆهدەشت، سێ کەس گیانیان لەدەستدا و کەسێکی دیکەش بریندار بوو.

 

محەممەد زارعی، بەڕێوەبەری پۆلیسی پارێزگاکە رایگەیاند، هۆکاری رووداوەکە لادان بۆ سایدی بەرامبەری یەکێک لە ئۆتۆمبێلە تایبەتەکان، تیژڕۆیی و پابەندنەبوون بە ماوەی سەلامەتی نێوان ئۆتۆمبێلەکان بووە. 

 

محەممەد زارعی گوتی، سێ لە سەرنشینەکان دەستبەجێ گیانیان لە دەستداوە و سەرنشینەکەی دیکەش کە بریندار بووە گواستراوەتەوە بۆ نەخۆشخانە.

 

ساڵانە لە ئێران و رۆژهەڵاتی کوردستان ژمارەیەکی زۆری خەڵک بە رووداوی هاتووچۆ گیانیان لەدەستدەدەن.

 

رۆژی 7ی نیسانی 2024، ئەحمەد شیرانی، بەڕێوەبەری ناوەندی زانیاری و کۆنترۆڵی ترافیکی پۆلیسی هاتووچۆی ئێران رایگەیاند، لە سەرەتای نەورۆزەوە تائێستا 100 هەزار رووداوی هاتووچۆ لەو وڵاتە روویانداوە و بەهۆیەوە 813 کەس گیانیان لەدەستداوە و 21 هەزار و 441 کەسیش بریندار بوون.