کوردستان
پشتیوان سادق، ئەندامی مەکتەبی سیاسیی پارتی دیموکراتی کوردستان و بەرپرسی مەکتەبی رێکخستنی پارێزگای هەولێر
رووداو دیجیتاڵ
ئەمڕۆ 78 ساڵ بەسەر دامەزراندنی پارتی دیموکراتی کوردستان تێدەپەڕێت. بەرپرسی مەکتەبی رێکخستنی پارێزگای هەولێری ئەو حیزبە دەڵێت، "پارتی بەردەوام خەباتی کردووە و سازشی لە دۆزی رەوای خەڵکی کوردستان نەکردووە."
رۆژی هەینی 16-08-2024 ساڵیادی دامەزراندنی پارتی دیموکراتی کوردستان بوو. مەکتەبی رێکخستنی پارێزگای هەولێر ئاهەنگێکی بەو بۆنەیەوە لە هەولێر سازکرد.
پشتیوان سادق، ئەندامی مەکتەبی سیاسیی پارتی دیموکراتی کوردستان و بەرپرسی مەکتەبی رێکخستنی پارێزگای هەولێر لە ئاهەنگەکەدا گوتی، "پارتی لەپێناو دروستبوونی ئەمڕۆ، ساتێک نەوەستا و بەردەوام خەباتی کرد و سازشی لەسەر دۆزی رەوای خەڵکی کوردستان نەکرد. پارتی دیموکراتی کوردستان حیزبێکی خاوەن ئەزموونی کەڵەکەبووی خەباتی سەدان ساڵەی دیپلۆماسی، ململانێی سیاسی و شاخ و شارە."
بەرپرسی مەکتەبی رێکخستنی پارێزگای هەولێری پارتی ئەوەشی گوت، پارتی لەسەر دەستی مەلا مستەفا بارزانی دامەزرا؛ "ئەو کەسە کەموێنەیە لە ساتە زۆر سەخت و دژوارەکاندا کوردی بە جیهان ناساند. بارزانیی نەمر لەنێو دڵی ملیۆنان کورد رەگی خۆی داکوتیوە."
پشتیوان سادق ئاماژەی بەوە دا کە پارتی دیموکراتی کوردستان بناخەی سەرەکیی دامەزراندنی قەوارەی هەرێمی کوردستانە و ئەوەش وایکردووە وەکو "دەوڵەتێک سەیری هەرێمی کوردستان بکرێت، نەوەک وەک هەرێمێک."
بەرپرسی مەکتەبی رێکخستنی پارێزگای هەولێری پارتی گوتی، "ئێمە وەک پارتی دیموکراتی کوردستان لەگەڵ خەڵکی خۆمان دەبین، کەموکوڕییەکان چارەسەر دەکەین و دەستکەوتەکان گەورەتر دەکەین."
پشتیوان سادق ئاماژەی بە پێکەوەژیانی هەرێمی کوردستان کرد و گوتی، "ئەو پێکەوەژیانە لە مەنهەجی پارتی و کولتووری خەڵکی کوردستاندا هەبووە و هەیە، پێویستە هەموومان بیپارێزین. لە دەرەوە، ئەو پێکەوەژیانە یەکێکە لە شانازییە زۆر گەورەکانی خەڵکی هەرێمی کوردستان، جگە لە خۆبەختکردن، یەکێکی دیکە لە خاڵەکانی پاراستنی هەرێمی کوردستان ئەو پێکەوەژیانەیە کە هەیە."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ