دوو رۆژە فڕۆکە جەنگییەکانی تورکیا بۆردوومانی دەڤەری برادۆست دەکەن

 

 

ئیحسان چەلەبی، قایمقامی سیدەکان بە تۆڕی میدیایی رووداوی راگەیاند، لە بۆردوومانەکاندا مێرمنداڵێک بەناوی (رامین فرسەت حەمەدەمین) کە ماڵیان لەو ناوچەیە نزیکە و بۆ مەبەستی ئاژەڵداری لەو سنوورە نیشتەجێن، بە سووکی بریندار بووە.

 

قایمقامی سیدەکان گوتیشی، بەردەوام فڕۆکەی چاودێری بەسەر ئاسمانی سنوورەکەدا دەسوڕێتەوە و ناوەناوە بەرزاییەکانی سنووری سیدەکان بۆردوومان دەکات.

 

ئەو شوێنانەی ئەمڕۆ و دوێنێ بۆردوومان کراون نزیکن لەو شوێنانەی کە دەیان ماڵی هاونیشتمانییانیان تێدان، کە لەم وەرزەدا بۆ کاری ئاژەڵداری و کشتوکاڵکردن لەو ناوچە سنوورییانە نیشتەجێن.