داواکاری گشتیی هەرێمی کوردستان داوا لە پارێزەران دەکات کۆنگرەی رۆژنامەڤانی نەبەستن

 

 

رۆژی 14ی حوزەیران، لیژنەی تۆمارکردنی داوای مافی گشتی لە داواکاری گشتی بە نووسراوی ژمارە 208 بە ناونیشانی "ئاگادارکردنەوە" ئاراستەی سەندیکای پارێزەرانی کوردستانی کردووە و داوای لێدەکات رێکاری کارگێڕی و یاسایی دژی ئەو پارێزەرانە بگرێتەبەر کە دوای دەرچوونی بڕیار لە دادگەکان، لەبەردەم دادگە کۆنگرەی رۆژنامەڤانی رێکدەخەن و لێدوان بۆ کەناڵەکانی میدیا دەدەن، هەندێکجار لە پەخشی راستەوخۆشدا ناوی دادوەران و داواکاری گشتی باس دەکەن و نهێنیی دادگەکان بڵاودەکەنەوە، ئەمەش لەڕووی یاساییەوە قەدەخەیە، ئەوەش بەپێی ماددەکانی 235/236 لە یاسای سزادانی عێراقی بۆ ساڵی 1969.

 

لە نووسراوەکەیدا لیژنەکەی داواکاری گشتی داوا دەکات ئەو دیاردەیە کۆتایی پێبهێندرێت کە بە "نایاسایی" ناوی هێناوە و دەڵێت، زیان بە رەوتی لێکۆڵێنەوە دەگەیێنێت و هانی خەڵکیش دەدات دژی دادگە بن.

 

هەڤاڵ عەبدوڵڵا بەرزنجی، جێگری نەقیبی سەندیکای پارێزەرانی کوردستان بە تۆڕی میدیایی رووداوی گوت، "بەپێی یاسای شێوازی دادگاییەکانی سزایی و یاسای پارێزەرایەتی، نابێت پارێزەر نهێنییەکانی دادگاییکردن ئاشکرابکات و پێش رووداوەکان بکەوێت. پارێزەر لە خەڵکی ئاسایی جیاوازە و لە یاساکان شارەزایە و رەنگە ئاشکراکردنی لێکۆڵینەوە و زانیاری زیان لە لێکۆڵینەوە و دادگە بدات، بۆیە ئەگەر پارێزەر ئەوە بکات، ئەوا سەندیکا بەپێی کەیسەکان ئیجرائاتی خۆی دەکات".

 

هەڤاڵ عەبدوڵڵا گوتیشی، بەشێک لەو کۆنگرە رۆژنامەنووسییانەی هەندێک پارێزەر رێکی دەخەن، دەچنە چوارچێوەی زیانگەیاندن بە رەوتی لێکۆڵینەوە، ئەگەرچی ئەمە نەبووەتە دیاردە.

 

جێگری نەقیبی سەندیکای پارێزەرانی کوردستان ئاماژەی بەوەش کرد، لە سەندیکا دوو جۆر سزا هەیە: یەکەمیان ئاگادارکردنەوە و راگرتن کە بۆ ماوەی شەش مانگ زیاتر نەبێت، دووەمیان سزایەکە لە "لیژنەی بەرزەفتکردن" کە چەندین بڕگە لەخۆی دەگرێت، لەوانە، "ئاگادارکردنەوە، راگرتن لە کار لە رۆژێکەوە بۆ دوو تا سێ ساڵ بەپێی کەیسەکە، هەروەها وەرگرتنەوەی ناسنامە و مافی پارێزەرایەتی".

 

لە 16ی ئەم مانگە، سەندیکای پارێزەرانی کوردستان نووسراوێکی بە ناونیشانی "پاراستنی نهێنی دۆسییەکانی دادگە" بۆ گشت لق و ژوورەکانی سەر بە سەندیکای پارێزەران ناردووە و داوا لە پارێزەران دەکات "بەوپەڕی بەرپرسیارێتییەوە زانیاری و نهێنییەکان بپارێزن و بە هیچ شێوەیەک بۆ راگەیاندنەکان و لە تۆڕەکانی سۆشیاڵ میدیا و کەناڵە جیاوازەکان ئەو نهێنییانە نەدرکێنن"، چونکە وەکو لە نووسراوەکە باسی لێوەکراوە، ئەو کارە دەبێتە هۆی زیانگەیاندن بە رەوتی لێکۆڵینەوە و دادگاییکردن و تەنانەت کێشەش بۆ ئەندامانی خێزانی دادوەری دروستدەبێت، پاساویشی بە ماددەکانی 235 و 236 لە یاسای سزادانی عێراق و ماددەکانی 42 و43 لە یاسای پارێزەرایەتیی هەرێمی کوردستان هێنایەوە.

 

هەرێم رەفعەت، یەکێک لەو پارێزەرانەیە کە چەندجارێک کۆنگرەی رۆژنامەوانیی بۆ چەند پرسێک لەپێش دادگەکان بەستووە، ئەو بە تۆڕی میدیایی رووداوی راگەیاند، "وەکو خۆم، پابەندی بڕیارەکە نابم و هیچ یاسایەک نییە ئەو کارەی ئێمە دەیکەین قەدەخە بکات، چونکە ئەو کۆنگرە رۆژنامەڤانییانە و ئەو لێدوانانەی دیدەین بۆ دەزگاکانی راگەیاندن، بۆ ئەوەیە راستییەکان نەشاردرێنەوە"، دەشڵێت، ئەوان وەکو پارێزەرانی چالاک هیچ کاتێک ناوی دادوەرەکان و لێکۆڵەران و ئەفسەران ئاشکراناکەن و هیچ کاتێک نهێنیی لێکۆڵینەوەکان نابەنە دەرەوە.

 

ئەو پارێزەرە ئاماژەی بەوەش کرد "سەرەتا ویستیان کاری خۆبەخشی قەدەخەبکەن، ئێستا دەیانەوێت قسەکردنمان لێ قەدەخە بکەن و ئەمەش سەرەتایەکە بۆ ئەو کارە".

 

هەرێم رەفعەت دەپرسێت "بە چ دەقێکی یاسایی رێگە لە کۆنگرەی رۆژنامەڤانی لەپێش دادگە کراوە؟ ئێمە لەڕێگەی دەسەڵاتی چوارەمەوە ناهەقییەکانی ناو دادگەکان بە خەڵک دەگەیێنین و من پابەندی ئەو بڕیارە نایاساییەی سەندیکای پارێزەران نابم".

 

ئەو پارێزەرە کە خۆبەخشی چەندین کەیسیشە دەڵێت، ئەوەی سەندیکای پارێزەرانی کوردستان باسی دەکات تەواو نایاساییە، لەبەرئەوەی کاتی بەسەرچووە، بۆیە هەر بڕیارێک دەریدەکات نایاساییە.

 

باسی لەوەش کرد "لەڕێگەی راگەیاندنەکانەوە بە شێوازی باش کاریگەریمان لەسەر رەوتی لێکۆڵینەوەکان هەبووە، بەتایبەت لەو کاتانەی هەستمان بەوە کردووە کە هەندێک کەیس رێڕەوی یاسایی خۆیان لەدەستدەدەن و لایەنگیریی تێدا دەکرێت، بۆیە پەنا دەبەینە بەر دەسەڵاتی چوارەم".