داوای گواستنەوەی گوندێکی قەرەتەپە دەکرێت

 

رۆژی پێنجشەممە 16-05-2024 وەسفی تەمیمی، بەڕێوەبەری ناحیەی قەرەتەپە بە رووداوی گوت، گوندەکە زیانی گەورەی بەرکەتووە، ژیان تێیدا سەخت بووە، شوێنەکەشی نزمە و ئەگەری هەیە جارێکی دیکە بەر لافاو بکەوێت، بۆیە دانیشتوانی گوندەکە داوایان پێشکێشکردووە، گوندەکەیان بگوازرێتەوە شوێنێکی دیکە.

 

بەڕێوەبەری ناحیەی قەرەتەپە گوتیشی "داواکەمان بۆ سەرووی خۆمان بەرزکردووتەوە، بۆ رەزامەندیدان و دەرخستە، چاوەڕێی وەڵامی فەرمیین، تاوەکو دەست بە گواستنەوە بکەن." 

 

سەبارەت بە شوێنی نوێی گوندەکە، بەڕێوەبەری ناحیەی قەرەتەپە گوتی، لە نزیک گوندەکە شوێنی بەردەڵان و بەرز هەیە، بڕیارە گوندەکە بۆ ئەو شوێنە بگوزارێتەوە.

 

ناحیەی قەرەتەپە سەر بە قەزای خانەقینە، دەکەوێتە ناوچە کوردستانییەکانی دەرەوەی ئیدارەی هەرێمی کوردستان. رۆژی 03-05-2024 لافاو گوندەکانی کەشکۆڵی کۆن، سەلام، دۆرە و بەگالی گرتەوە، بەڵام زۆرترین زیان بە کەشکۆڵیی کۆن کەوت.

 

لافاو زیانی لە نزیکەی 160 ماڵ داوە، 60 ماڵیان زۆرترین زیانیان بەرکەوتووە و خانووەکانیان کە قوڕ بووە، رووخاون. ئەوانی دیکە 50% زیانیان بەرکەوتووە، 105 سەر مەڕ و شەش مانگا مرداربوون و چوار ئۆتۆمبێل ژێرئاو کەوتن.

 

رۆژی 12-05-2024 ئەحمەد مەزهەر جبووری، جێگری سەرۆکی لیژنەی دارایی لە پەرلەمانی عێراق، کە هاوکات نوێنەری پارێزگای دیالەیە لە پەرلەمانی عێراق، نووسراوێکی بۆ محەممەد شیاع سوودانی، سەرۆکوەزیرانی عێراق کرد بۆ قەرەبووکردنەوەی زیانلێکەتووان و سەرۆکوەزیرانیش رەزامەندیی لەسەر قەرەبووکردنەوەیان دەربڕیوە.