ماوه‌ی پێشکێشکردن و تاقیکردنەوەى توانستى زانستى دکتۆرا و ماستەر درێژکرایەوە

 

رۆژی سێشەممە 16ـی ئایاری 2023، وەزارەتی خوێندنی باڵا و توێژینەوەی زانستی رایگەیاند، ئامانجیان رەخساندنی دەرفەتی زیاترە بۆ خوازیاران و پێشکێشکارانی خوێندنی باڵا. 

 

بەگوێرەی بڕیارەکەی وەزارەتی خوێندنی باڵا، درێژکردنەوەی ماوه‌ی پێشکێشکردن بۆ خوێندنی باڵا، دیپلۆمى باڵا و ماسته‌ر و دكتۆرا، لە رۆژی پێنجشەممە 18-05-2023ـەوە بۆ رۆژی یەکشەممە 04-06-2023 دەبێت.

 

ئاماژە بە دواخستنی تاقیكردنه‌وه‌ی توانستی زانستی کراوە لە 29-5-2023ـەوە بۆ 12-6-2023.

 

ئەمساڵ وەزارەتی خوێندنی باڵا زیاتر لە 7 هەزار کورسی راگەیاندووە کە پێکدێن لە: دوو هەزار و 308 کورسیی دیپلۆمی باڵای یەک ساڵە، 160 دیپلۆمی باڵا دوو ساڵەی پزیشکی، بۆ خوێندنی ماستەر سێ هەزار و 312 کورسی و بۆ خوێندنی دکتۆرا هەزار و 834 کورسی. 

 

 

بازنەی یەکەم؛ بۆ وەزارەتی خوێندنی باڵا و مامۆستایان و فەرمانبەرانی وەزارەتی خوێندنی باڵایە. 

 

بازنەی دووەم؛ بۆ ناوەندەکانی دیکەی حکومەتی هەرێمی کوردستانە. 

 

بازنەی سێیەم؛ بۆ پارالێلە کە بۆ هەموو هاونیشتمانییانی هەرێمی کوردستانە بە فەرمانبەر، دامەزراو و دانەمەزراوەوە.

 

لە 2ـی نیسان کاتی پێشکێشکردن بۆ ماستەر و دکتۆرا دەستپێکرد و بڕیاربوو تاوەکو 18ـی ئایاری 2023 بەردەوام بێت؛ رێکەوتی ئەنجامدانی تاقیکردنەوەی توانستی زانستیش رۆژی دووشەممە 29ـی ئایاری 2023 دیاریکرابوو؛ دەستپێکی خوێندنی دەکەوێتە مانگی ئەیلوولەوە و نەگۆڕاوە. 

 

لەکاتی پێشکێشکردن بۆ ماستەر و دکتۆرا، بڕەپارەیەک لە پێشکێشکاران وەردەگیرێت کە لەنێوان 200 بۆ 250 هەزار دینارە و لە ئەگەری ناونەهاتنەوەشدا، ئەو پارەیە بۆ پێشکێشکار ناگەڕێنرێتەوە.