پۆلیسی هەولێر: برایەک بە گولـلە خوشکێکی کوشت
رووداو دیجیتاڵ
گوتەبێژی پۆلیسی هەولێر رایدەگەیێنێت، گەنجێک لە هەولێر گولـلەیەکی لەسەری خوشکی دا و بەهۆیەوە دوای دوو کاژێر مانەوە لە نەخۆشخانە، گیانی لەدەستدا.
ئەمڕۆ پێنجشەممە، 16-03-2023، مقەدەم هۆگر عەزیز، گوتەبێژی پۆلیسی هەولێر بە تۆڕی میدیایی رووداوی راگەیاند، هێزەکانیان ئاگادارکرانەوە بە "بوونی رووداوێکی زامدارکردن لە نەخۆشخانە"، دوای گەیشتنی هێزەکانیان و ئەنجامدانی لێکۆڵینەوە بۆیان دەرکەوت کە برایەک بە "گولـلە" خوشکێکی بریندار کردووە، بەڵام دوای دوو کاژێر مانەوە لە نەخۆشخانە، کچەکە گیانی لەدەستدا.
گوتەبێژی پۆلیسی هەولێر گوتی، رووداوەکە لەسەر کێشەیەکی کۆمەڵایەتی بووە و ئەو كچەی کە کوژراوە ناوی (صورە)ـیە و تەمەنی 28 ساڵە. دەشڵێت، تۆمەتبار کە برای کچەکەیە و ناوی (ر. س. ص.)ـە و تەمەنی 32 ساڵە، دەستگیرکراوە و دانی بە تاوانەکەیدا ناوە.