رووداو دیجیتاڵ
بەڕێوەبەری دەروازەی سنووریی تەمەرچین لە پارێزگای ورمێی رۆژهەڵاتی کوردستان رایگەیاند، لە 10 مانگی رابردوودا زیاتر لە 762 هەزار کەس لە رێگەی دەروازەی سنووریی تەمەرچین - حاجی ئۆمەرانەوە گەشتیان کردووە، هەروەها زیاتر لە 82 هەزار بارهەڵگر لەو دەروازە سنوورییەوە باریان گواستووەتەوە.
محەممەد رەزایی، بەڕێوەبەری دەروازەی سنووریی تەمەرچین، ئەمرۆ پێنجشەممە رایگەیاند، هاتووچۆی گەشتیار و بار‌هەڵگرەکان، هەروەها گواستنەوەی بار بە شێوەی ترانزێت لە رێگەی دەروازەی سنووریی تەمەرچین - حاجی ئۆمەرانەوە بەشێوەیەکی بەرچاو زیادیکردووە.
رەزایی گوتی، لە ماوەی 10 مانگدا 762 هەزار و 457 کەس لەو دەروازە سنوورییەوە هاتووچۆیان کردووە، کە بەراورد بە ساڵی پار ٪33.94 زیادیکردووە. بە گوتەی رەزایی، ساڵی پار 569 هەزار کەس لە سنووری تەمەرچین-حاجی ئۆمەرانەوە هاتووچۆیان کردووە.
سەبارەت بە هاتووچۆی پاسەکان، بەڕێوەبەری دەروازەی سنووریی تەمەرچین دەڵێت، لە 10 مانگدا 8 هەزار و 954 پاس لە رێگەی ئەو دەروازە سنوورییەوە هاتووچۆیان کردووە کە بەراورد بە ساڵی رابردوو 21٪ کەمتر بووە.
ئاماژە بە گواستنەوەی بار لە لایەن بارهەڵگرەکانیش دەکات و دەڵێت: "هەر لەو ماوەیەدا 82 هەزار و 808 بارهەڵگر لە دەروازەی سنووریی تەمەرچین - حاجی ئۆمەران هاتووچۆیان کردووە کە بەراورد بە پار 27٪ زیاترە، بەو شێوەیە کە 42 هەزار و 77 بارهەڵگر لە ئێران دەرچوونە و 40 هەزار و 731 بارهەڵگریش هاتوونەتە نێو ئێران."
بەڕێوەبەری دەروازەی سنووریی تەمەرچین باسی بەرزبوونەوەی ئاماری ترانزیت لەو دەروازە سنوورییەش دەکات و دەڵێت، بەراورد بە پار ترانزیتی کەلوپەل بۆ دەرەوەی وڵات 406٪ و ترانزیت بۆ ناوخۆی ئێران 221٪ زیادی کردووە.
بە گوتەی محەممەد رەزایی، لەو 10 مانگەدا 16 هەزار و 220 بارهەڵگر کەلوپەل بە شێوەی ترانزیت لە رێگەی دەروازەی سنووریی تەمەرچین-حاجی ئۆمەرانەوە گوێزراوەتەوە، لە کاتێکدا ساڵی پار تەنیا 3 هەزار و 956 بارهەڵگر کەلوپەل لەو سنوورەوە ترانزیت کرابوو.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ