رووداو دیجیتاڵ
دوای نزیکەی پەنجا ساڵ، دانیشتووانی گوندێکی ناحیەی گرعوزێر، کە کوردی ئێزدین، دەگەڕێنەوە زێدی خۆیان و گوندەکەیان ئاوەدان دەکەنەوە.
دانیشتووانی گوندی تەل بەهلوول، کە کوردی ئێزدیین، لە نێوەڕاستی حەفتاکانی سەدەی رابردوو بەر شاڵاوی راگواستنی رژێمی بەعس کەوتن، لە زێدی خۆیان دەرکران و لە کۆمەڵگەی سیپاشێخ خدر نیشتەجێبوون.
گوندی تەل بەهلوول، دەکەوێتە ناحیەی گرعوزێر سەر بە قەزای بەعاجە لە رۆژئاوای پارێزگای نەینەوا.
دوای هاتنی داعش لە 2014، جارێکی دیکە ئاوارە بوون، دوای کۆتایی هاتنی داعش لە بری گەڕانەوە بۆ کۆمەڵگەی سیپاشێخ خدرێ، چوونەتەوە گوندەکەیان.
خدر خودێدا، بەڕێوەبەری ناحیەی گرعوزێر، رۆژی شەممە، 18-01-2025، بە تۆڕی میدیایی رووداوی راگەیاند، بەگەڕانەوەی ئەمانە کێشە دروستبووە، چونکە گوندەکە لە نەخشەی ناحیەکە نەماوە، ئەمانە لەسەر زەوی زێدەڕۆ و کشتوکاڵی ماڵ و خانوویان دروستکردووە و بەشێکیان لەنێو خێوەتدان.
گرفتێکی دیکە ئەوەیە ئەمانە کاتی خۆی ژمارەیان کەم بووە، ئێستا ژمارەیان زیادی کردووە، بۆیە وەک بەڕێوەبەری ناحیەکە باسی دەکات، پێویستییان بە رووبەڕێکی زیاتری زەوییە بۆ نیشتەجێبوون و ئاوەدانکردنەوەی گوندەکە.
بەڕێوەبەری ناحیەی گرعوزێر بە پێویستی دەزانێت، چوارچێوەیەکی یاساییان بۆ بدۆزرێتەوە، تاوەکو بتوانن بە فەرمی ئاو، کارەبا، رێگەوبان و خزمەتگوزاریی دیکەیان بۆ دابین بکرێت.
گوندەکە بێ خزمەتگوزارییە و دانیشتووانەکەی بەهۆیەوە گرفتارن، خدر خودێدا دەڵێت، بەشێوەیەکی نایاسایی کارەبا بۆ گوندەکە راکێشراوە، چونکە گوندەکە لەسەر نەخشەی فەرمی نەماوە. بە تەنکەریش ئاویان بۆ دەچێت.
بەڕێوەبەری ناحیە داوای لە هۆبەی کشتوکاڵی ناحیەکە کردووە لەسەر ئەو گوندە راپۆرتێک ئامادە بکات و بڕیاریشە رۆژی یەکشەممەی داهاتوو چاوی بە نوێنەرانی گوندەکە بکەوێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ