رووداو دیجیتاڵ
لە پارێزگای ئەردەخانی باکووری کوردستاندا وێنەی فیلێک بڵاوکراوەتەوە کە شوانێک دەڵێت بە چاوی خۆی بینیویەتی، ئەمە حکومەتیشی هێنایە سەر هێڵ.
رۆژی سێشەممە، 14-11-2023، لە گوندێکی سەر بە ناوەندی پارێزگای ئەردەخان کە بە گوندی گۆلابەردی ناسراوە، فیلەکە بینراوە و شوانێک وێنەکەی بڵاوکردەوە و رایگەیاند "لەناکاو رووبەڕووی فیل بووەتەوە". وێنەکە بە خێرایی لە تۆڕە کۆمەڵایەتییەکاندا بڵاوبووەوە و هاونیشتمانیان قسەیان لەسەر کرد.
چەند تیمێکی فەرماندەیی جەندرمە نێردرانە ناوچەکە و گەڕان بەدوای فیلەکە دەستیپێکرد. ئێوارە کاتێک تاریکی باڵی بەسەر ناوچەکەدا کێشا، تیمەکان رووناکیی تایبەتیان بەکارهێنا و تاوەکو درەنگی شەو بەردەوام بوون لە گەڕان، بەڵام گەڕانەکە هیچ ئەنجامێکی نەبوو و هیچ فیلێکیش نەدۆزرایەوە.
خەیرەدین چیچەک، پارێزگاری ئەردەخان گوتی، بینینی فیل لەو ناوچەیەی ئەردەخان دوورە لە راستییەوە و ئەمە شتێکی بێبنەما و دروستکراوە.
ئەوەی بووەتە پرسیار ئەوەیە کە شوانەکە وێنەکەی بڵاوکردووەتەوە و ئێستاش دەڵێت، دڵنیایە لەوەی بە چاوەکانی خۆی فیلی بینیوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ