بووک لە ئەڵمانیاوە گەڕایەوە دێرسم و لەسەر نەریتی کۆن زەماوەندی کرد

 

 

ئەوەی لە سەرەتای ڤیدیۆیەکەدا دەردەکەوێت، ئامادەکارییە بۆ ئاهەنگێکی بووکگواستنەوە. ئەسپەکە ئامادەیە، لەگەڵ دەنگی دەهۆڵ و زوڕناوە هەڵپەڕکێ دەکرێت و کەژاوەی بووک و زاوا بە شەقامی سەرەکیی دێرسمدا تێدەپەڕێت. 

 

ئانیڵ دومان، زاواکەیە و دەڵێت: "لە تەمەنی منداڵیماندا ئەم کولتوورەمان لە گەورەکانمان بینی و لەگەڵی ژیاین. بێگومان ئەمە کولتووری ئێمەیە و بەشێکە لە ئێمە و ناتوانین نکۆڵی لێ بکەین. من و هاوژینەکەم بڕیارێکی وەهامان دا و گوتمان ئێمەش زیندووی دەکەینەوە. ئەم کارەمان کرد و زۆر جوانیش دەرچوو و زۆر پێمان خۆش بوو".

 

هاونیشتمانییان سەرسامن و لەڕێی مۆبایلەکانیانەوە وێنەی ئەو ئاهەنگە دەگرن. بووک لە ئەڵمانیا دەژی، بۆ زیندووکردنەوەی ئەم کولتوورە گەڕاوەتەوە دێرسم. هەروەک خۆی دەڵێت، ئاواتی بووە بەمشێوەیە زەماوەند بکات.

 

بەرفین یاڵگین ، بووکەکەیە و ئاماژە بەوە دەکات: "پوورم 45 ساڵ لەمەوبەر بە ئەسپ گواستراوەتەوە. جا من بەردەوام دەمگوت، دەمەوێت بە سواریی ئەسپ ئاهەنگەکەمان بکەین و کولتووری خۆمان زیندوو بکەینەوە. وەکو ئەوە وابوو گەشتی کات بکەم و زۆر دڵخۆش بووم".

 

ئامادەبووان ماوەیەکی زۆر شاییان کرد، هەر لەسەر نەریتی کۆنیش پیرۆزباییان لە بووک و زاوا کرد.