لە ئامێدی 40 دۆنم زەوی و باخی هاونیشتمانییان بەهۆی شەڕەوە سووتان

 

 

ئاگرەکە بەیانیی رۆژی دووشەممە کەوتەوە و هەشت کاژێر پاوان و رەز و باخی هاونیشتمانییانی سووتاند. بەشێکیان رەزی ترێ بوون. 

 

محەممەد مێرستەكێ، جووتیارە و دەڵێت: "چاوەڕێمان دەکرد ئەم مانگە بەرهەمی ئەو رەز و باخانە خۆین کە سووتاون. بەرهەمەکەش کێشە نەبوو، بەڵام درەخت و رەز و باخەکە هەمووی لەنێوچوو." 

 

جگە لە دارمێو، بەرهەمی سماق، باوێ، هەنجیر و زەیتوون سووتاون. ئەم ساڵ ساڵێکی بەرهەمدار بوو، بەڵام ئەوەی ئەو رەز و باخانە هەیانبوو، هەمووی لەنێوچوو. 

 

نزار حوسێن، جووتیارە و دەڵێت: "ئەو بەرهەمەی بە داریشەوە ماوە، بەکەڵک نەماوە. دووکەڵی بەرکەوتووە، بە کەڵکی هیچ نایەت. هیچ شتێک نەما. رەزی ترێ و باوێ هەمووی لەنێوچووە. ناوچەیەکی زۆر سووتا. نەک هەر رەز و باخ، بەڵکو گیانەوەر و شتی دیکەش سووتاوە. گوناهە." 

 

بەگوێرەی بەرگریی شارستانیی دهۆک، بەهۆی گرژییەکانی نێوان سوپای تورکیا و پەکەکە، زیاتر لە 25 هەزار دۆنەم دارستان، پووش و پاوانی خەڵکی سووتاوە.