پۆلیسی هەولێر دەستگیرکردنی دوو دزی راگەیاند
رووداو - هەولێر
پۆلیسی هەولێر دەستگیرکردنی دوو دزی راگەیاند. دزەکان رۆژانی هەینی لەپێش سێ مزگەوت دزییان کردووە، پۆلیسیش داوا لە هاونیشتمانیان دەکات هەر کەسێک لەماوەی سێ هەفتەی رابردوودا لەپێش ئەو سێ مزگەوتە دزی لێکراوە، سکاڵا تۆماربکات.
وەک لە راگەیێندراوەکەدا ئاماژەی پێدراوە، دزەکان دوو کەس بوونە و رۆژانی هەینی لەکاتی گوتاری هەینیدا لەپێش مزگەوتەکانی نۆشەهید و رەشاد موفتی و نانەکەلی دزییان کردووە.
پۆلیس باسی لەوەش کردووە کە دوای دەستگیرکردنیان، دزەکان دانیان بە تاوانەکەیاندا ناوە و گوتوویانە، ئەو ئۆتۆمبێلانەی کەوا کەمێک جامیان کراوە بووە، هەڵساون بە هێنانەخوارەوەی جامەکانیان و بردنی کەلوپەلەکانی نێو ئۆتۆمبێلەکان.
پۆلیس داوادەکات هەر کەسێک لەماوەی سێ هەفتەی رابردوودا لەپێش ئەو مزگەوتانە دزی لێکراوە، بەزووترین کات سەردانی نووسینگەی نەهێشتنی تاوانی راستی بکات بۆ تۆمارکردنی سکاڵا.
پۆلیسیی هەولێر جەختی لەوە کردووەتەوە کە پەڕاوی لێکۆڵینەوە بۆ دزەکان رێکخراوە و رەوانەی بەردەم دادوەری لێکۆڵینەوە کراون. دڵنیاییش دەداتە هاووڵاتیان کە هەمیشە چاوکراوەن بۆ پاراستی سەر و ماڵیان.