مەسرور بارزانی: مامۆستایان لە قۆناخە سەختەکاندا درێژەیان بە ئەرکی خۆیان داوە

 

رۆژی دووشەممە، 15ـی ئایاری 2023، مەسرور بارزانی، سەرۆکوەزیرانی هەرێمی کوردستان بە بۆنەی 61ـەمین ساڵیادی دامەزراندنی یەكێتیی مامۆستایانی کوردستان پەیامێکی بڵاوکردەوە و تێیدا دەڵێت، "پیرۆزباییەکی گەرم ئاراستەی سەرۆک و ئەندامانی مەکتەبی سکرتارییەت و سەرجەم مامۆستایانی کوردستان دەکەم و هیوای بەردەوامی و سەرکەوتنیان بۆ دەخوازم."

 

سەرۆکی حکومەتی هەرێمی کوردستان دەشڵێت، "یەکێتیی مامۆستایانی كوردستان، رۆڵێکی دیار و خەباتێکی درەوشاوەی هەیە لە بزووتنەوەی رزگاریخوازی گەلی کوردستاندا، کە هەمیشە لە سەنگەری پێشەوەی بەرگریکردن بووە لە مافەکانی خەڵکی کوردستان و خەباتی پیشەیی لە پێناو داکۆکیکردن لە مافەکانی مامۆستایان."

 

مەسرور بارزانی باس لەوەش دەکات، "لەم بۆنەیەدا ، بە سوپاس وپێزانینەوە رۆڵی مامۆستایانی کوردستان بەرز دەنرخێنین کە لە قۆناخە جیاواز و سەختەکاندا، درێژەیان بە ئەرکی پیرۆزی خۆیاندا لە پێناو بەردەوامبوونی پرۆسەی پەروەردە و فێرکردن و پێگەیاندنی نەوەکانمان" و هیواداش دەخوازێت مامۆستایانی كوردستان، "سەرکەوتووانە لە ئەرک و رۆڵی کاریگەری خۆیان بەردەوام بن لە پێناو دروستکردن و پێگەیاندنی نەوەیەکی نیشتمانپەروەر و داهێنەر، بۆ ئەوەی بە هاوکاریی هەموولایەک، کوردستان زیاتر گەشە بکات و لە هەموو بوارەکاندا پێشبکەوێت."

 

لە هەرێمی کوردستان زیاتر لە 130 هەزار مامۆستای هەمیشەیی، 30 هەزار فەرمانبەر و زیاتر لە 22 هەزار وانەبێژ هەن، بەشێکی مامۆستایان ئەندامی یەکێتیی مامۆستایانن.