لە کرماشان لە هەفتەیەکدا 4 کەس لە شاخ کەوتوونەتە خوارەوە و گیانیان لەدەستداوە

 

محەممەدباقر محەممەدی، بەڕێوبەری مانگی سووری پارێزگای کرماشان ئەمڕۆ شەممە گوتی، درەنگانی رۆژی 14.04.2023 لە ناوچە شاخاوییەکانی سەر بە شاری شاباد، شاخەوانێک کەوتووەتە خوارەوە و گیانی لەدەستداوە.

 

ئەوە لە کاتێکدایە، بەیانیی رۆژی هەینی 14-4-2023ش دوو شاخەوان لە ناوچە شاخاوییەکانی "پەڕاو" سەر بە شاری سەحنە، بەهۆی خراپیی کەشوهەواوە کەوتوونەتە خوارەوە و یەکێکیان گیانی لەدەستداوە. 

 

بەگوتەی محەممەدباقر محەممەدی، ئەو رووداوە بەیانیی زوو روویداوە و هێزە یارمەتیدەرەکان بەهۆی بارانبارینەوە کاژێر 8ـی بەیانی خۆیان گەیاندووەتە شاخەوانە بریندارەکە و لەوێ چارەسەری سەرەتاییان بۆ کردووە و گواستویانەتەوە بۆ نەخۆشخانە.

 

لە ناوچە شاخاوییەکانی سۆنقوری کولیایش، رۆژی 11.04.2023 هاونیشتمانییەکی 62 ساڵ تەمەن لە شاخ کەوتە خوارەوە و گیانی لەدەستدا. 

 

رۆژی 07.04.2023ش خەڵک پەیوەندییان بە مانگی سووری شاری داڵاهۆوە کرد و رایانگەیاند، هاونیشتمانییەک لە شاخ کەوتووەتە خوارەوە، هێزە یارمەتیدەرەکانی مانگی سوور دوای 4 کاژێر توانییان تەرمی ئەو هاونیشتمانییە 60 ساڵ تەمەنە لە ناوچە شاخاوییەکان ببەنە خوارەوە.