سەرۆکی حکومەتی هەرێمی کوردستان لە پەیامێکدا د. رۆژ نووری شاوەیس بە تێکۆشەرێکی گەورە و سیاسەتکارێکی بە ئەزموون ناویدەبات کە خۆی و بنەمالەکەی "رۆڵێکی دیار و گرنگییان لە بزووتنەوەی رزگاریخوازی گەلی کوردستاندا هەیە".

پەیامی هاوخەمیی سەرۆکی حکومەتی هەرێمی کوردستان بۆ کۆچی دوایی د.ڕۆژ نووری شاوەیس

بە خەمگینی و ماتەمینیەکی قووڵەوە، هەواڵی کۆچی دوایی سیاسەتکار و پێشمەرگەی ئازا و فەرماندەی بە توانا و تێکۆشەری ناسراوی کوردستان و ئەندامی مەکتەبی سیاسی پارتی، (د.ڕۆژ نووری شاوەیس) لە ناخەوە زۆر خەمباری کردم. 

د.ڕۆژ و بنەماڵە نیشتمانپەروەرەکەی ، رۆڵێکی دیار و گرنگییان لە بزووتنەوەی ڕزگاریخوازی گەلی کوردستاندا هەیە و بە کۆچی دوایی د.ڕۆژیش، گەلی کوردستان تێکۆشەرێکی گەورە و سیاسەتکارێکی بە ئەزموونی لە دەستدا کە لە هەموو ئەو ئەرک و بەرپرسیاریەتییە گرنگانەی لە هەرێمی کوردستان و عێراقدا هەیبووە ، هەمیشە داکۆکیکارێکی بەهێزی مافەکانی خەڵکی کوردستان بوو و نموونەی وەفاداری بوو.   

بەم بۆنە خەمناکەوە ، پرسە و سەرەخۆشی لە جەنابی سەرۆک بارزانی و سەرکردایەتی و ئەندامانی پارتی دیموکراتی کوردستان و لە خۆمان و بنەماڵەی بەڕێز و تێکۆشەری خوالێخۆشبوو د. ڕۆژ دەکەم . خوای مەزن گیانی بە بەهەشت شاد بکات و ئارامیی و دڵنەواییش بە هەموومان ببەخشێت. 

خەبات و تێکۆشانی د.ڕۆژ، هەمیشە لە یادماندا بە زیندوویی دەمێنێتەوە.
مەسرور بارزانی 
سەرۆکی حکومەتی هەرێمی کوردستان 
2021/2/15

فازڵ میرانی، سکرتیری مەکتەبی سیاسی پارتی لە پەیامێکدا بۆ کۆچی دوایی د. رۆژ نووری شاوەیس سەرەخۆشی لە بنەماڵەکەی دەکات و دەڵێت رایگەیاند، خەباتگێڕی میلەتەکەمان کۆچی دواییکرد.

بسم الله. الرحمن الرحيم 
كلُّ نَفْسٍ ذَآئِقَةُ الْمَوْتِ وَإِنَّمَا تُوَفَّوْنَ أُجُورَكُمْ يَوْمَ الْقِيَامَةِ

بەداخەوە ئەمڕۆ (د. ڕۆژ نوری شاویس) ئەندامی مەکتەبی سیاسی پارتیمان، خەباتگێڕی میلەتەکەمان کۆچی دوایی کرد. بەو بۆنە خەمناکەوە پرسەو سه رخوشي خۆمان ئاراستە بنەماڵە تێکۆشەرەکەیان دەکەین و لە خوای گەورە داواکارم کە بە بەهەشتی بەرینی خۆی شادی کات.

انا لله وانا الیه راجعون

فەوزی هەریری، سەرۆکی دیوانی سەرۆکایەتیی هەرێمی کوردستان لە تویتێکدا هاوخەمیی خۆی بۆ کۆچی دوایی د. رۆژ نووری شاوەیس دەربڕی و رایگەیاند: "ئێمە خەمبارین بۆ کۆچی ناوادەی فەرماندە، راوێژکار و، سیاسەتمەدار دکتۆر رۆژ نووری شاوەیس کە بە نەخۆشیی کۆچی دوایی کرد".

لە بەشێکی دیکەی تویتەکەیدا فەوزی هەریری دەنووسێت: "دکتۆر رۆژ یادەوەرییەکی بۆ جێهێشتین کە کاریگەریی لەسەر نەوەکانی داهاتوو دەبێت".