چالاکڤانان لە سنە داوای هەڵوەشاندنەوەی سزای لەسێدارەدانی پەخشان عەزیزی دەکەن

 

 

ئەو چالاکڤانانە بە هەڵگرتنی درووشمی "نا بۆ لەسێدارەدان؛ بەڵێ بۆ ژیان" و "پەخشان هیوایە بۆ ژیان" داوایان کرد، سزای لەسێدارەدانی پەخشان عەزیزی، چالاکڤانی مافی ژنان هەڵبوەشێندرێتەوە.

 

ئەو هاونیشتمانییانە داوا لە پارێزگاری سنە دەکەن، پێگە و توانای خۆی بەکاربهێنێت بۆ هەڵوەشاندنەوەی سزاکە.

 

دیوانی باڵای دادوەریی ئێران رۆژی 08-01-2025 سزای لەسێدارەدانی پەخشان عەزیزی پەسند کرد.

 

ئەو هاونیشتمانییە لە 4ـی ئابی 2023 لەکاتێکدا لەگەڵ ئەندامانی بنەماڵەکەی لە تاران بوو، لەلایەن هێزە ئەمنییەکانی ئێران دەستبەسەر کرا و لە دادگەی شۆڕشی تاران بە تۆمەتی چالاکی چەکداری دژی دەسەڵاتی ئێران دادگاییکرا و بە لەسێدارەدان سزا درا. 

 

پەخشان عەزیزی لەدایکبووی ساڵی 1984 و خەڵکی مهابادە. دوای دەستپێکردنی شەڕی داعش سەردانی باشوور و رۆژئاوای کوردستانی کرد و لە کەمپی پەنابەراندا وەک یاریدەدەری کۆمەڵایەتی بە تایبەت هاوکاری ژن و منداڵانی کرد.

 

شەش ریپۆرتێری تایبەتی نەتەوە یەکگرتووەکان رۆژی 15-01-2025 لە بەیاننامەیەکی هاوبەشدا رایانگەیاند، پەخشان عەزیزی لە عێراق و سووریا وەک یاریدەدەرێکی کۆمەڵایەتی هاوکاری ئاوارەکانی شەڕی کردووە و تۆمەتبارکردنی بە چالاکی چەکداری بێ بنەمایە.

 

پێشتر ئەمیر رەئیسیان، پارێزەری پەخشان عەزیزیش رایگەیاندبوو، لە دۆسیەکەیدا هیچ بەڵگەیەک نییە بیسەلمێنێت، ئەو بەندکراوە چالاکی چەکداری هەبووە.