بەربژێرێکی CDU: پێویستە کۆچبەران لە رێگەی کار و پەروەردەوە ببنە بەشێک لە کۆمەڵگەی ئەڵمانی

 

ڤێ رۆت ئاماژەی بەوەش کرد کە پێویستە هەموو بەربەستێک لە بەردەم کارکردنی کۆچبەراندا لاببرێت، چونکە کارکردن رۆڵێکی سەرەکی دەبینێت لە یەکخستنی کۆچبەران لە کۆمەڵگەدا. هەروەها دەبێت رێگە خۆش بکرێت بۆ ئەوەی کە کۆچبەران بتوانن ببنە بەشێک لە کۆمەڵگەی ئەڵمانی، ئەمەش هەموو شتێک ئاسانتر دەکات. ئەو جەختیکردەوە کە پارتی (CDU) هەمیشە پشتیوانی لە پاراستنی کەمینەکان کردووە و بەردەوام دەبێت لەو پشتیوانییە.

 

ئێستا پارتەکانی ئەڵمانیا دەستیان بە بانگەشەی هەڵبژاردن کردووە بۆ هەڵبژاردنی پەرلەمانی فیدراڵی کە لە مانگی شوباتی ئەم ساڵ بەڕێوەدەچێت، ئەوەش دوای ئەوەی لە پەرلەمان متمانە بە راوێژکاری ئەڵمانیا نەدرایەوە و هەڵبژاردنی پێشوەختە راگەیێندرا.  

 

ڤێ رۆت جەختی لەوە کردەوە کە دەبێت سیستمی چاودێریی تەندروستی بە شێوەیەکی باش دابین بکرێت و نابێت بڕی بودجەی بۆ کەم بکرێتەوە. ئەو گوتی کە دەبێت چاودێریی تەندروستی گونجاو لە شار و ناوچە گوندنشینەکاندا بەردەست بێت، چونکە تەندروستیی خەڵک زۆر گرنگە بۆ ئەوەی بتوانن کار بکەن و ببنە بەشێک لە کۆمەڵگە.

 

ڤێ رۆت هەروەها باسی هەڵوێستێکی خۆی کرد کە هەوڵیداوە هەموو لایەنە دیموکراتیەکان لە شاری بۆخوم کۆبکاتەوە، لەوانەش نوێنەرانی رێکخراوەکانی کۆچبەران، بۆ ئەوەی پەیامێک بنێرێت کە کارکردن لەگەڵ پارتی (AfD) مەحاڵە. 

 

ئەو بەربژێرە هەروەها ئاماژەی بەوە کرد کە پێویستە ئەڵمانیا پشتیوانی لە کەرتی پیشەسازی بکات بۆ ئەوەی بتوانێت لە ئاستی نێودەوڵەتیدا کێبڕکێ بکات. هەروەها داوای کەمکردنەوەی بیرۆکراسی و دابینکردنی نرخی وزەی گونجاو بۆ کۆمپانیاکان کرد.