راوێژکارێکی سوودانی داوا لە ئیلۆن مەسک دەکات سەردانی شنگال بکات

 

 

د. خەلەف شنگالی، راوێژکاری محەممەد شیاع سوودانی، سەرۆکوەزیرانی عێراق بۆ کاروباری کوردانی ئێزدی، ئەمڕۆ چوارشەممە 15-01-2025 بە تۆڕی میدیایی رووداوی راگەیاند، هیواخوازن ئیلۆن مەسک سەردانی شنگال بکات.

 

ئیلۆن مەسک رۆژی 07-01-2025 لە هەژماری فەرمیی خۆی لە تۆڕی کۆمەڵایەتیی ئێکس نووسی، "ئایا دەکرێت ئەوەی بەسەر خەڵکی ئێزدیدا هات، رۆژێک بەسەر ئەورووپاشدا بێت؟"

 

راوێژکارەکەی سوودانی گوتی، "ئەگەر ئیلۆن مەسک بیەوێت سەردانی کۆچۆ و شنگال بکات، ئەوا هەموو ئاسانکارییەکی بۆ دەکەین تاوەکو بە چاوی خۆی قەبارەی ئەو تراژیدیا، کۆمەڵکوژی و وێرانەیە ببینێت کە داعش بەسەر کوردانی ئێزدیی هێنا."

 

03-08-2014 چەکدارانی داعش هێرشیان کردە سەر شنگال و دەوروبەری؛ لەو هێرشەدا 11 هەزار و 417 کوردی ئێزدی رفێندران، کۆمەڵکوژ و بێسەروشوێن کران.

 

د. خەلەف شنگالی پێیوایە هاتنی ئیلۆن ماسک بۆ شنگال لەسەر ئاستی نێودەوڵەتی کاریگەریی بۆ سەر ئەو دۆسیەیە دەبێت و وا دەکات گرنگیی زیاتری پێبدرێت.

 

تاوەکو ئێستا پەرلەمانی 13 وڵات دانیان بە جینۆسایدی کوردانی ئێزدیدا ناوە.