بارەگای هێزێکی سەر بە ئەژی ئەمین کرایە ئامانج
رووداو دیجیتاڵ
لە هێرشەکانی سەر هەولێر چەند بارەگایەکی سەر بە فەرماندەیی ئۆپەراسیۆنە تایبەتەکانی سەر بە ئاژانسی پاراستن و زانیاری/زانیاری، لەلایەن سوپای پاسدارانەوە کرانە ئامانج، بەڵام ئەژی ئەمین و هێزەکەی زیانیان بەرنەکەوتووە.
بەرەبەیانی رۆژی سێشەممە سەرچاوەیەک لە ئاژانسی پاراستن و زانیاری/زانیاری بە تۆڕی میدیایی رووداوی راگەیاند: "ئەو هێرشە مووشەکییەی شەوی رابردووی هەولێری کردە ئامانج چەند بارەگایەکی تیمی ئۆپەڕاسیۆنە هاوبەشەکانی سەر بە ئاژانسی پاراستن و زانیاری/زانیاری لە هەورازە نەفتەی لە نزیک شاری هەولێری کردووەتە ئامانج."
ئەو سەرچاوەیە گوتیشی: "بەڵام دوو مووشەکیان لەلایەن تیمی ئۆپەراسیۆنە هاوبەشەکانەوە بە مووشەکی دژە هەوایی وەڵامدراونەتەوە و هەردووکیان خراونەتە خوارەوە و هیچ زیانێکیان نەبووە."
ئەو سەرچاوەیە ئەو هەواڵانەشی رەتکردەوە گوایە ئەژی ئەمین، کرابێتە ئامانج و بەهۆی هێرشەکەوە زیانی بەرکەوتبێت، دووپاتیشی کردەوە" ئەژی ئەمین سەلامەتە."
شەوی دووشەممە، 15ـی کانوونی دووەمی 2024، ژمارەیەک مووشەک شاری هەولێر و دەوروبەری کردە ئامانج، مووشەکەکان نزیک فڕۆکەخانەی هەولێر، کونسوڵخانەی ئەمریکا، هەریر و دەورووبەری، چەند شوێنێکی دیکەی کردە ئامانج.
سوپای پاسدارانی ئێران بەرپرسیارێتی خۆی لە هێرشەکە گرتە ئەستۆ و رایگەیاند ئەو هێرشانە ژمارەیەک شوێنی کردووەتە ئامانج کە بە گوتەی خۆیان "بنکەی تیرۆریستی" و گرووپە دژبەرەکانی ئێران بووە.