رووداو دیجیتاڵ
بەخشراوێکی خەڵکی شۆریجەی کەرکووک، کە 20 ساڵ بوو خۆی نەشوشتبوو، لەلایەن چەند گەنجێکەوە شۆردرا؛ بەڵام چەند کاژێرێک دواتر گیانی لەدەستدا. تەندروستیی کەرکووکیش دەڵێت: تائێستا دیارنییە هۆکاری گیانلەدەستدانی بەهۆی شۆردنەکە بووە یان نا.
رۆژی شەممە، 14ـی کانوونی یەکەمی 2024، سامان یابە عەلی، گوتەبێژی تەندروستیی کەرکووک بە تۆڕی میدیایی رووداوی راگەیاند، بەخشراوەکە ناوی عەباسە و ساڵانێکی زۆربوو لەسەر شەقامەکان دەمایەوە، نزیکەی 20 ساڵ بوو خۆی نەشوشتبوو؛ شەوی رابردوو لەلایەن چەند گەنجێکی خۆبەخشەوە دەشۆردرێت، چەند کاژێرێک دوای شۆردنی بە هۆکارێکی نادیار گیانی لەدەستدا.
سامان یابە گوتی: "تائێستا نەمانتوانیوە بەشێوەیەکی زانستی بیسەلمێنین کە هۆکاری گیان لەدەستدانی بەهۆی ئەو شۆردنەوە بووە."
دوای گیانلەدەستدانی، تەرمی عەباس بردراوەتە دادپزیشكیی کەرکووک. سامان یابە گوتی: "راپۆرتی توێکاری تەرمی عەباس نێردراوە بۆ بەغدا، دوای نزیکەی 20 رۆژ ئەنجامەکەی دەردەچێت."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ