بانگەشەی هەڵبژاردن لە نەینەوا
رووداو دیجیتاڵ
پارتی و یەکێتی لە نەینەوا هەریەکەیان 52 بەربژێری هەیە و دەخوازن زیاتر دەنگی عەرەب مسۆگەر بکەن، لەو چوارچێوەیەشدا پارتی 25٪ و یەکێتیش 42٪ـی بەربژێرەکانی لە نەتەوەی عەرەبن.
یەکێک لە بەربژێرانی لیستی پارتی لە نەینەوا، نەباء عیزەدینە کە لە نەتەوەی عەرەبە و ئێستا لە دوا ساتەکانی بانگەشەی هەڵبژاردن، لە هەمووکات سەرقاڵترە. گرنگترین ئەو کارانەی بانگەشەی بۆ دەکات، مافەکانی ئافرەت و خزمەتکردنی ناوچەکانی ماددەی 140ـە.
نەباء عیزەدین بە رووداوی گوت "یەکەم شت، سەرنج دەخەمە سەر پەروەردە، دووەمیش رۆڵی ژنان، چونکە رۆڵیان لە کۆمەڵگەدا گرنگە و ئاشتی بەهێزتر دەکات، سێیەمیان کار و کەسی بێکارە، لەهەمان کاتدا هەوڵدەدەم مادەی 140ـی دەستووریش جێبەجێ بکرێت، چونکە هەردوو حکومەتی ناوەندی و هەرێمی کوردستان خەمساردییان تێدا کردووە. بەهەمان شێوە کەرتی تەندروستی و خزمەتگوزاریی نەینەواش لای من زۆر گرنگن کە لە پاشن و دەمەوێت کار لەسەر ئەو سێکتەرانە بکەم.''
بانگەشەی هەڵبژاردنی ئەنجوومەنی پارێزگا لە موسڵ، سەنتەری پارێزگای نەینەوا گەرموگوڕە، پۆستەر و وێنەی بەربژێران شۆستەکانیان داپۆشیوە.
پرۆگرامی بەربژێرێکی عەرەب لە لیستی یەکێتی لە نەینەوا، زۆربەی تایبەتە بە کارکردن بۆ گەڕاندنەوەی ئاوارەکان و باشترکردنی خزمەتگوزاری و کەرتی تەندروستی.
جوان نعێمی، بەربژێری یەکێتی لە نەینەوا بە رووداوی گوت "یەکەم هەنگاو کەمپەکانی ئاوارەکانە کە ئێستا بەزۆر لەنێو کەمپەکان هێڵراونەتەوە، جگە لەوەش کەرتی تەندروستی زۆر خراپە و نەخۆشخانەی تایبەتمەندمان نین.''
پارێزگای نەینەوا 26 کورسی و سێی کۆتای هەیە، بە بوونی زیاتر لە ملیۆنێک و 650 هەزار دەنگدەر یەکێکە لە گەورەترین پارێزگەکانی عێراق و هەموو لایەنەکان دەخوازن لەم هەڵبژاردنەدا زۆرترین دەنگی ئەنجوومەنی پارێزگاکەی بەدەستبهێنن و ئەوان پارێزگاکە بەڕێوەببەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ