لە شاری ئامەد ژنێک کوژرا

 

 

رووداوەکە ئێوارەی رۆژی چوارشەممە 13ـی کانوونی یەکەمی 2023 لە گەڕەکی پیشەسازی سەر بە شارۆچکەی باژارانوو لە ناوەندی شاری ئامەد روویدا. ئەو ژنەی تەقەی لێکراوە تەمەنی 41 ساڵە و ناوی "م.پ."ـە، پۆلیسیش تاوەکو ئێستا ناسنامەی تەقەکەرەکانی ئاشکرانەکردووە.

 

دوای ئاگادارکردنەوەی لایەنە پەیوەندیدارەکان، تیمەکانی پۆلیس و فریاگوزاریی تەندروستی "112" رەوانەی شوێنی رووداوەکە کران.

 

"م. پ." کە لە رووداوەکەدا بە سەختی برینداربوو، گوازرایەوە نەخۆشخانەیەکی تایبەت و دواتر رەوانەی نەخۆشخانەی کۆلێژی پزیشکی زانکۆی دیجلە کرا. سەرباری هەوڵی پزیشکان بەڵام بریندارەکە لە نەخۆشخانە گیانیلەدەستدا.

 

بە گوێرەی راپۆرتێکی فیدراسیۆنی کۆمەڵەی ژنانی تورکیا کە لە نێوەڕاستی مانگی رابردوو بڵاوکراوەتەوە، لە یەکی کانوونی دووەم تاوەکو 31ـی تشرینی یەکەمی 2023، لە تورکیا و باکووری کوردستان 350 ژن کوژراون.