وێنەی 5 ئەندامە کوژراوەکەی دوو بنەماڵەکەی دهۆک/ئەرشیڤ.
رووداو دیجیتاڵ
دادگەی مێردین ئەمڕۆ سزای زیندانیکردنی تاهەتایی بۆ دوو تاوانباری کوشتنی 5 هاونیشتمانیی دهۆک دەرکرد.
رۆژی 19ی کانوونی دووەمی 2023، پێنج ئەندامی دوو خێزانی دانیشتووی شاری دهۆک کە بۆ چارەسەری پزیشکی دەچوونە تورکیا، لە رێگەی سەرەکیی نسێبین - مێردین لە باکووری کوردستان، لە لایەن دوو چەکدارەوە رێگری لە ئۆتۆمبێلەکەیان کرا و بە دەمانچە پێنج کەسیان کوشت.
ئەمڕۆ دادگەی چوارەمی مێردین هەشتەمین دانیشتنی خۆی لەسەر دۆسیەکە کرد و بڕیاری لەسەر سزای تاوانباران دا.
دوو لە تاوانباران بە ناوەکانی فارس ئاکسەڤەن و عەبدوڵڵا کاپلان، سزای بەندکردنی تاهەتاییان بۆ دەرکرا.
هەر یەک لەو تاوانبارانە 5 جار سزای زیندانیی تاهەتایی لەسەر کوشتنی پێنج هاووڵاتییەکە و جارێک سزای 15 ساڵ بەندکردن لە بەرامبەر تاڵانکردنی سامانی کوژراوان، بۆیان دەرکرا.
چی روویدا؟
شەوی 19-01-2023 ئەو پێنج هاونیشتمانییە بە ئۆتۆمبێلی خۆیان بەرەو ئامەد دەچوون. لەسەر رێگەی نسێبین - مێردین، دوو رێگری چەکدار ئۆتۆمبێلەکەیان وەستاند و تەقەیان لە هەر پێنج کەسەکە کرد.
عەبدوڵا ساڵح مستەفای تەمەن 69 ساڵ، چیمەن شاهین خالدی هاوژینی و هندرینی کچیان دەستبەجێ لە شوێنی تاوانەکە گیانیان لەدەستدا.
وەحیدە حەیدەر جاسمی تەمەن 63 ساڵ و حەئمەد جەلالەدین ئیبراهیمی تەمەن 45 ساڵیش بە برینداری گوێزرانەوە نەخۆشخانە بەڵام بەهۆی سەختیی برینەکانیان، گیانیان سپارد.
دوای لێکۆڵینەوە، عەبدوڵڵا کاپلان، فارس ئاکسەڤەن و سێ کەسی دیکە بە ناوەکانی مورات یگیتی، ئیبراهیم دۆگان و چیدگەم بۆزکورت دەستگیرکران.
عەبدوڵڵا کاپلان، فارس ئاکسەڤەن و مورات یگیت بە تۆمەتی "تاوانی بە شەو، شاردنەوەی تاوان و بەڵگەکان، بەشداریکردن لە تاڵانکردنی چەکداریدا،" دادگاییکران.
ئیبراهیم دۆگانیش بە تۆمەتی فرۆشتن و بردنی گوللـەی بێ مۆڵەت دادگاییکرا. چیگدەم بۆزکورت بە تاوانی "شاردنەوەی تاوان" رووبەرووی لێپرسینەوە کرا.
نوێ دەکرێتەوە...
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ