رەوتی هەڵوێست: لەگەڵ یەکێتی و پارتی ناچینە حکومەتەوە

 

ئێوارەی رۆژی چوارشەممە 13-11-2024 محەممەد شیاع سوودانی، سەرۆکوەزیرانی عێراق گەیشتە فڕۆکەخانەی نێودەوڵەتیی سلێمانی و لەلایەن بافڵ تاڵەبانی، سەرۆکی یەکێتیی نیشتمانیی کوردستان، قوباد تاڵەبانی، جێگری سەرۆکوەزیرانی هەرێمی کوردستان پێشوازی لێکرا.

 

جیا لە یەکێتیی نیشتمانیی کوردستان، جووڵانەوەی نەوەی نوێ و یەکگرتووی ئیسلامیی کوردستان، سەرۆکوەزیرانی عێراق لە سلێمانی لەگەڵ رەوتی هەڵوێستی نیشتمانی کۆبووەوە.

 

دوای کۆبوونەوەکە، عەلی حەمە ساڵح، سەرۆکی رەوتی نیشتمانیی کوردستان لە کۆنفرانسێکی رۆژنامەڤانیدا رایگەیاند: ''وردەکارییەکانی تایبەت بە هەڵبژاردنی پەرلەمانی کوردستانمان باسکرد کە چی روویداوە.''

 

20ـی تشرینی یەکەمی 2024 هەڵبژاردنی خولی شەشەمی پەرلەمانی کوردستان بەڕێوەچوو کە ژمارەیەک لە لایەنە سیاسییەکانی بەشدار لە پڕۆسەکە و لە نێویاندا رەوتی هەڵوێست، گلەیی و ناڕەزاییان لەسەر ئەنجامەکان هەبوو و تانەیان لە ئەنجامەکەی دا.

 

عەلی حەمە ساڵح گوتی: ''گرنگە تێبینییەکانی ئێمە لەبەر چاوبگیرێن و ئەوانیش [عێراق] بەدواداچوونی بۆ بکەن، بەتایبەتی کە هەڵبژاردنی عێراق نزیکە، بەردەوامبوونی ئەم بابەتانە [ساختەکاری] کۆتایی بە متمانەی هەڵبژاردن دەهێنێت.''

 

بەشێک لە کۆبوونەوەکەی سوودانی و رەوتی هەوڵێستی نیشتمانی تایبەت بوو بە مووچەی فەرمانبەرانی هەرێمی کوردستان، بەجێکردن و پڕۆژەی هەژماری من. بەگوتەی سەرۆکی رەوتەکە، ''سەرۆکوەزیرانی عێراق باسی لەوە کردووە، سەبارەت بە بەجێکردن و ناردنی مووچەی فەرمانبەرانی کوردستان، لەگەڵ بڕیاری دادگەی فیدراڵییە.''

 

پلەبەرزکردنەوەی فەرمانبەران، جیاوازیی باج و رسوومات، نرخی کارەبا و بەنزین لە نێوان هەرێمی کوردستان و عێراق، بەشێکی دیکە لە نێوەرۆکی کۆبوونەوەی محەممەد شیاع سوودانی و رەوتی هەڵویستی نیشتمانی بوون.

 

14 رۆژ لە مانگی تشرینی دووەم تێپەڕیوە، بەڵام هێشتا مووچەی مانگی تشرینی یەکەمی مووچەخۆرانی هەرێمی کوردستان نەنێردراوە. عەلی حەمە ساڵح گوتی: ''بە وردی پرسیاری مووچەی مانگی 10 و 11 و 12ـمان لە سەرۆکوەزیرانی عێراق کرد و زۆر بە روونی گوتی، لە دۆخی کوردستان تێگەیشتووین، دەزانین دۆخی خەڵک خراپە، نامانەوێت فەرمانبەران ببنە قوربانی، بەڵام ئەمە چارەسەری یاسایی پێویستە.''

 

بەگوتەی سەرۆکی رەوتی هەڵوێست، سوودانی گوتوویەتی: ''من دەڕۆمەوە و هەموو هەوڵێکم بۆ ئەوە دەبێت کە ئەوەندەی بتوانم و یاسا رێگە بدات، مووچەی ئەم سێ مانگەی فەرمانبەرانی هەرێمی کوردستان نەکرێنە قوربانی.''

 

 

بە گوێرەی ئەنجامی کۆتایی هەڵبژاردنی پەرلەمانی کوردستان، رەوتی هەڵوێستی نیشتمانی چوار کورسیی پەرلەمانی بەدەستهێناوە. عەلی حەمە ساڵح جەختی لەوە کردەوە، ''ئێمە بڕیاری خۆمان داوە و متمانەی خۆمان نادۆڕێنین، لەگەڵ یەکێتی و پارتی ناچینە حکومەتەوە.''

 

لە هەڵبژاردنەکەدا، پارتی 39 کورسی، یەکێتی 23 کورسی، نەوەی نوێ 15 کورسی، یەکگرتوو 7 کورسی، کۆمەڵ 3 کورسی، بەرەی گەل 2 کورسی، گۆڕان 1 کورسی و هاوپەیمانیی هەرێمی کوردستان 1 کورسی بەدەستهێناوە.