پۆستەری بانگەشە لە سلێمانی.
رووداو دیجیتاڵ
پارێزگای سلێمانی، ئەو بازنەیەی لە هەڵبژاردنەکانی رابردوو دەنگدەرانی چەند جارێک لیستی دڵخوازی ژمارە یەکیان لە حیزبێکەوە بۆ حیزبێکی دیکە گۆڕیوە، یەکێتی، گۆڕان و تا رادەیەک نەوەی نوێ ئەسپی خۆیان تاوداوە.
یەکێتیی نیشتمانی کوردستان لە هەڵبژاردنی رابردوو لە سنووری سلێمانی، هەڵەبجە، گەرمیان و راپەڕین 10 کورسی بەدەستهێنابوو، ئێستا دەڵی تەنیا لە سنووری پارێزگای سلێمانی 18 کورسیمان مسۆگەرە.
سەرکۆ ئازاد گەڵاڵی، بەربژێری یەکێتی دەڵێت: "بەو گۆڕانکارییانەی کردوومانە و بەسەرپەشتیی سەرۆک بافڵ چاوەری دەکەین لە سلێمانی 18 بۆ 20 کورسی بهێنینن و لە کوردستانیش 32."
پارتی دیموکراتی کوردستان بەڵێنی ئەوە دەدات داهاتی ناوخۆی سلێمانی بخاتە خزمەتی پارێزگاکە و پرۆژەکان دەستپێبکەنەوە، بەو دروشمە پێیان وایە کورسییەکانیان دوو هێندە زیاد دەکات.
هۆشیار سدیقە فەندی، سەرۆک لیستی پارتی لە سلێمانی دەڵێت: "کاردەکەین بۆ ئەوەی سلێمانی وەکو هەولێر و دهۆک لێ بکەین و ئارامی و ئاسایش بۆ شارەکە بگەرێنینەوە، هەلی کار دابین بکەین."
جگە لە یەکێتی و پارتی کە مێژوویەکی دێرینیان لە سلێمانی هەیە، لایەنە ئیسلامییەکان و حیزب و رەوتە نوێیەکانی وەک نەوەی نوێ، بەرەی گەل، گۆڕان، هەڵوێست چاویان لە کورسییەکانی ئەم پارێزگایە.
مستەفا عەبدوڵڵا،سەرۆک لیستی یەکگرتوو لە سلێمانی دەڵێت: "ئەگەر خەڵک دەنگ بەئێمە بدات، کاردەکەین بۆ ئەوەی کوردستان یەک زۆن بێت و وەکو یەک خزمەت بکرێت."
بەپێی ئامارەکانی کۆمیسوێن، لەسنووری پارێزگای سلێمانی یەک ملیۆن و 496 هەزار کەس مافی دەنگدانیان هەیە و لە 93٪ یان کارتی دەنگدانیان هەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ