رووداو دیجیتاڵ
بەڕێوەبەری گشتیی پەروەردەی پارێزگای کرماشان ئامادەیی قوتابخانەکانی ئەو پارێزگایەی بۆ دەستپێکردنی ساڵی نوێی خوێندن راگەیاند.
ئەمڕۆ شەممە 14-09-2024 سەلمان محەممەدی، بەڕێوەبەری گشتیی پەروەردەی کرماشان لە کۆنگرەیەکی رۆژنامەڤانیدا ئاماژەی بە کردنەوەی قوتابخانەکان لە هەفتەی داهاتوو کرد و رایگەیاند، 21ی ئەیلوول لە فێستیڤاڵێکدا بە ئامادەبوونی منداڵانی پۆلی یەکەم و خانەوادەکانیان، ئاهەنگێک ساز دەکرێت.
محەممەدی گوتی، بۆ ئەم ساڵی خوێندن، بەگشتی 370 هەزار قوتابی هەن، کە 30 هەزاریان دەبنە پۆلی یەکەمی سەرەتایی و 4000 قوتابخانە و 14 هەزار پۆل ئامادەن بۆئەوی قوتابییەکان تێیدا بخوێنن.
بەڕێوەبەری گشتیی پەروەردەی کرماشان ئاماژەی بەوەش کرد، بڕیارە 2000 مامۆستای نوێ دابمەزرێن و 40 قوتابخانەی نوێ کە لە 150 پۆل پێکدێت، لە سەرەتای خوێندن بەڕووی قوتابیاندا بکرێنەوە.
هەموو ساڵێک لە 21ی ئەیلوول، لە ئێران و رۆژهەڵاتی کوردستان خوێندن دەستپێدەکات.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ