لە شارۆچکەیەکی ئامەدەوە بیبەر هەناردەی ئەورووپا دەکرێ

 

"ساڵ دوای ساڵ خواست لەسەر ئەو بیبەرە زیاتر دەبێت." ئەمە گوتەی ئادەم کاراتاش، قایمقامی چەرمیک-ـە و هەروەها دەڵێت: "وەبەرهێنەرانمان ساڵانە رووبەری زیاتر بۆ چاندنی ئەم جۆرە بیبەرە تەرخان دەکەن. ئەم ساڵ لە رووبەرێکی نزیکەی 400 دۆنمیدا ئەم بیبەرە چێندراوە. نزیکەی هەزار و 600 تۆن بەرهەممان هەیە".

 

بیبەری چەرمیک لە کێڵگەکانەوە بۆ نێو ئامەد دەگوازرێتەوە. بەشێکی بەسەر خواردنگەکاندا دابەش دەکرێت و کەبابی جۆری تاراکی پێ بەتامتر دەکرێت. سرووشتی ئەو جۆرە کەبابە وایە کە بیبەرەکە پێکهێنەرێکی سەرەکییەتی.

 

هەفتانە 200 بۆ 250 کیلۆ بیبەری چەرمیک دەنێردرێتە دەرەوەی وڵات. محەممەد دوڕان، وەبەرهێنەرە لەوبارەیەوە گوتی: "لە دەرەوەی وڵاتیشەوە داواکاریمان هەیە و بۆیان دەنێرین. ناردوومانەتە ئەڵمانیا، هەروەها کارگۆمان بۆ سویسراش هەیە. گەشتیاران لەگەڵ خۆیان دەیبەن".

 

جومعە چیفتچی، خاوەن فرۆشگەی سەوزە و میوە: "بۆ زۆر لە کڕیارانمان بیبەری چەرمیک لە قوتوو دەکەین و بە کارگۆ دەینێرینە دەرەوەی وڵات. بۆ نموونە، ئێستا کارگۆی ئەڵمانیا و هەنگاریامان لەبەردەستە، لە قوتووی دەکەین و دەینێرین".

 

بیبەری چەرمیک ساڵی 2021 بڕوانامەی براندی لە دەزگەی پاتێنتی تورکیا وەرگرت و بە فەرمی بووە براند.