نێچیرڤان بارزانی و کۆنسووڵی نوێی ئەمریکا: هیوادارین پرۆسه‌ى ده‌نگدان سه‌ركه‌وتووانه به‌ڕێوه بچێت
رووداو دیجیتاڵ
سەرۆکی هەرێمی کوردستان پێشوازی لە کۆنسووڵی نوێی ئەمریکا لە هەولێر کرد. نێچیرڤان بارزانی، خواستى هه‌رێمى كوردستانى بۆ بره‌ودان به هاريكاريى هاوبه‌ش و په‌يوه‌ندييه‌كانى له‌گه‌ڵ ئه‌مريكا دووپات كرده‌وه.
ئەمڕۆ چوارشەممە، 14-08-2024، نێچیرڤان بارزانی، سەرۆکی هەرێمی کوردستان پێشوازی لە ستێڤ بیتنەر، کۆنسووڵی ئەمریکا لە هەولێر کرد. سەرۆکی هەرێمی کوردستان پیرۆزبایی دەستبەکاربوونی لە کۆنسووڵی ئەمریکا کرد و هيواى سه‌ركه‌وتنى بۆ خواست.
کۆنسووڵی نوێى ئه‌مريكا، "به‌رده‌واميى پشتگيرى و هاوبه‌شى و هاوپه‌يمانيى وڵاته‌كه‌ى له‌گه‌ڵ عێراق و هه‌رێمى كوردستاندا دووپات كردەوە".
وەکو لە راگەیێندراوی سەرۆکایەتیی هەرێمی کوردستان دا هاتووە، "هه‌ردوولا جه‌ختيان له گرنگيى هه‌ڵبژاردنى په‌رله‌مانى كوردستان كرده‌وه و هيوايان خواست پرۆسه‌ى ده‌نگدان سه‌ركه‌وتووانه به‌ڕێوه بچێت".
دەقی راگەیێندراوی سەرۆکایەتیی هەرێمی کوردستان:
نيوه‌ڕۆى ئه‌مڕۆ چوارشه‌ممه 2024/8/14 به‌ڕێز نێچيرڤان بارزانى، سه‌رۆكى هه‌رێمى كوردستان، له ديدارێكدا له‌گه‌ڵ به‌ڕێز ستێڤ بيتنه‌ر كونسوڵى گشتيى نوێى ئه‌مه‌ريكا له هه‌رێمى كوردستان، وێڕاى به‌خێرهێنان، پيرۆزبايی ده‌ستبه‌كاربوونى لێكرد و هيواى سه‌ركه‌وتنى بۆ خواست، هه‌روه‌ها خواستى هه‌رێمى كوردستانى بۆ بره‌ودان به هاريكاريى هاوبه‌ش و په‌يوه‌ندييه‌كانى له‌گه‌ڵ ئه‌مه‌ريكا دووپات كرده‌وه.
له ديداره‌كه‌دا كه به‌ڕێز مارك سترۆ كونسوڵى گشتيى پێشووى ئه‌مه‌ريكا له هه‌رێمى كوردستان ئاماده بوو، سه‌رۆك نێچيرڤان بارزانى سوپاسى كونسوڵى پێشووى كرد و هيواى سه‌ركه‌وتنى بۆ خواست، ئه‌ويش لاى خۆيه‌وه سوپاسى هاوكارى و پشتگيريى لايه‌نه په‌يوه‌نديداره‌كانى هه‌رێمى كوردستانى بۆ سه‌رخستنى ئه‌ركه‌كه‌ى ده‌ربڕى.
له ديداره‌كه‌دا به‌ڕێز كونسوڵى گشتيى نوێى ئه‌مه‌ريكا به‌رده‌واميى پشتگيرى و هاوبه‌شى و هاوپه‌يمانيى وڵاته‌كه‌ى له‌گه‌ڵ عێراق و هه‌رێمى كوردستاندا دووپات كردەوە، هه‌روه‌ها هه‌ردوولا جه‌ختيان له گرنگيى هه‌ڵبژاردنى په‌رله‌مانى كوردستان كرده‌وه و هيوايان خواست پرۆسه‌ى ده‌نگدان سه‌ركه‌وتووانه به‌ڕێوه بچێت.
په‌يوه‌ندييه‌كانى هه‌ولێر ـ به‌غدا، دۆخى ناوخۆى عێراق و هه‌رێمى كوردستان و دوايين پێشهاته‌كانى ناوچه‌كه به‌گشتى، ته‌وه‌رێكى ديكه‌ى ديداره‌كه بوو.