لە وان 17 کەس بە تۆمەتی ئەندامێتی پەکەکە دەستگیرکران

بەڕێوەبەرایەتیی ئاسایشی وان بڵاویکردەوە، لەسەر راسپاردەی سەرۆکایەتیی داواکاری گشتیی شارەکە و لە چوارچێوەی لێکۆڵینەوە لە کەیسی پەکەکە/کەجەکە و بە بڕیاری دادگە، لە رۆژانی نێوان 6 بۆ 13ـی ئابی 2023، تیمەکانیان 17 کەسیان لە چەندین ئۆپەراسیۆندا دەستگیرکردووە. 

 

بەڕێوەبەرایەتیی ئاسایشی وان دەڵێت، بەشێک لەوانەی لە ئۆپەراسیۆنەکاندا دەستگیرکراون، لە رێکخستنەکانی گەنجانی سەر بە پەکەکە/کەجەکە چالاکییان ئەنجامداوە؛ بەشێکیشیان بە تۆمەتی داڵدەدانی گەریلاکانی پەکەکە و هاوکاریکردنیان، دەستگیرکراون. 

 

هەروەها ژمارەیەک ئامێری دیجیتاڵی و بەڵگەنامەی رێکخراوەیی لە شوێنی مانەوەی دەستگیرکراوەکاندا دەستیان بەسەردا گیراوە. 

 

دەستگیرکراوەکان دوای پشکنینی تەندروستییان، بەمەبەستی لێکۆڵینەوە رەوانەی هۆبەی بەرەنگاربوونەوەی تیرۆر لە بەڕێوەبەرایەتیی ئاسایش کراون.