رووداو- هەولێر
بڕیارە بەمەبەستی لێكۆڵینەوە لەسەر پاشماوەی بەكارهێنانی چەكی كیمیاوی، گۆڕستانی هەڵەبجەی شەهید لە لایەن حكومەتی عێراق هەڵبدرێتەوە.
لەسەر داواكاری وەزارەتی مافی مرۆڤ و وەزارەتی ژینگەی حكومەتی عێراق، بەهاوكاری بەشی كیمیاوی وەزارەتی بەرگری، بڕیارە پشكنین بۆ گۆڕستانی هەڵەبجەی شەهید ئەنجام بدرێت و لێكۆڵینەوە لەسەر پاشماوەی بەكارهێنانی چەكی كیمیاوی بكرێت .
لە بەیاننامەیەكدا ئەمیر حەسوون، گوتەبێژی وەزارەتی ژینگەی عێراق، رایدەگەیەنێت :" هەڵدانەوەی ئەو گۆڕستانە بۆ هەڵسەنگاندنی دۆخی شاری هەڵەبجەیە لە رووی ژینگەییەوە، كە گۆڕستانەكە تایبەتە بە شەهیدانی هەڵەبجەو تاوەكو ئێستا هەڵنەدراوەتەوە و تۆماریش نەكراوە".
گوتەبێژی وەزارەتی ژینگەی عێراق دووپاتیدەكاتەوە "فەرمانگەی هونەری وەزارەتی ژینگە، سەردانی یەكەمی هەڵەبجەی شەهیدی كردووە و بەر لەوەی كاری هەڵدانەوە بۆ گۆڕەكان بكرێت، لێكۆڵینەوە لەسەر رادەی پیسبوونی ژینگە دەكرێت لە شارەكەدا" .
حەسوون ئاماژەی بەوە كردووە " تیمە تایبەتەكانی وەزارەتی ژینگەو وەزارەتە ناوبراوەكان بەمزووانە دەست بەكاری هەڵدانەوەی گۆڕەكان دەكەن، كە بەیەكێك لە شایەتحاڵەكانی ئەنجامدانی ئەو تاوانانە هەژمار دەكرێت كە رژێمی پێشوو بەرامبەر بە گەلی عێراق ئەنجامیدان".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ