هێزی تایبەتی پاراستنی ئەمریکا: لە رووداوەکەی پێنسلڤانیادا هاووڵاتییەک کوژراوە و دوو هاووڵاتی دیکەش بە سەختی برینداربوون

 

نزیکەی دوو کاژێر دوای رووداوی تەقەکردنەکە، ئەنتۆنی گوگلیامی، بەرپرسی پەیوەندییەکان لە هێزی تایبەتی پاراستنی ئەمریکا لە راگەیێندراوێکدا گوتی، دەوروبەری کاژێر 6:15ی رۆژی 13-7-2024 (بە کاتی پێنسلڤانیا) (کاژێر 1:15ی بەرەبەیانی رۆژی 14-7-2024 بە کاتی هەولێر) تەقەکەرێک لە ناوچەیەکەوە کە بەسەر شوێنی بانگەشەی دۆناڵد ترەمپدا دەیڕوانی چەند گوللەیەکی بە ئاراستەی ئەو سەکۆیە تەقاند کە ترەمپ لەسەری وەستابوو و گوتاری لێیەوە پێشکێش دەکرد.

 

ئەنتۆنی گوگلیامی دەڵێت، هێزی تایبەتی پاراستنی ئەمریکا تەقەکەرەکەیان کوشت و هەر زووش رێکاری پاراستنیان گرتەبەر.

 

گوگلیامی ئاماژە بەوە دەکات، لە ئەنجامی تەقەکردنەکەدا یەکێک لە بەشداربووانی بانگەشەکە کوژرا و دوو کەسی دیکە برینداربوون و لێکۆڵینەوەکانیش بەردەوامن.

 

دۆناڵد ترەمپیش لە راگەیێندراوێکدا لەبارەی دۆخی خۆی قسەی کرد و گوتی، لە رووداوەکەدا گوللەیەک بەر بەشی سەرەوەی گوێی راستی کەوتووە و خوێنێکی زۆری لێ رۆیشتووە.