لە نزیک دووبز تەرمی دوو مێرمنداڵ لە زێی بچووک دەدۆزرێنەوە
رووداو دیجیتاڵ
دوو مێرمنداڵ لەکاتی مەلەوانی لە رووباری زێی بچووک لە قەزای دووبز خنکان و دوای چەند کاژێرێک تەرمەکانیان لەلایەن تیمەکانی پۆلیسی رووبارەوانی پردێ دۆزرانەوە.
سەرحەد فاتیح، ئەندامی تیمی پۆلیسی رووبارەوانی پردێ بە تۆڕی میدیایی رووداوی راگەیاند، تیمەکانیان لە رێگەی بەلەم و تیمی ژێر ئاوییەوە بەدوای تەرمەکاندا گەڕاون تاوەکو دۆزیویانەتەوە.
لەبارەی ناسنامەی دوو مێرمنداڵەکەوە سەرحەد فاتیح گوتی، هەردووکیان لەدایکبووی ساڵی2002ن، یەكێکیان ناوی غەسان یونس موحسینە کە دانیشتووی موسڵە و بۆ سەردان چووەتە ماڵی مامی و ئەوەی دیکەیشیان ناوی رمێس نایف موحسینە و خەڵکی دووبزە.
لەکاتی گەڕان بەدوای دوو تەرمەکە بۆ ماوەی چەند کاژێرێک لە بەنداوی دووبزەوە ئاوی رووبارەکە گیرایەوە بۆ ئەوەی ئاستی ئاوەکە دابەزێت.