مەسرور بارزانی لە ساڵیادی ئەنفالدا: داوا لە عێراق دەکەین زيانلێکەوتووان قەرەبوو بکاتەوە
رووداو دیجیتاڵ
سەرۆکوەزیرانی هەرێمی کوردستان لە ساڵیادی ئەنفالدا داوا لە حکومەتی عێراق دەکات "ئەرک، بەرپرسیاریەتیی ئەخلاقی و دەستووریی خۆی جێبەجێ بکات و زيانلێکەوتووان، بنەماڵە و کەسوکاری ستەملێکراوی دەستی رژێمی پێشووی عێراق، بە شێوەیەکی شایستە قەرەبوو بکاتەوە و هاوکاریی حکومەتی هەرێمی کوردستان بکات بۆ ئەوەی بە شێوەیەکی باشتر، بتوانێت خزمەتی کەسوکاری سەربەرزی شەهیدان بکات."
رۆژی 14-4-2023، 35 ساڵ بەسەر تاوانی ئەنفالدا تێدەپەڕێت کە یەکێک بوو لە هەوڵەکانی بەعس لە عێراق بۆ قڕکردنی کورد، ئەو هەڵمەتە کە بەھەشت قۆناخی یەک لە دوای یەک ئەنجامدرا؛ لە 22ـی شوباتی 1988ەوە دەستپێدەکات تاوەکو 6ـی ئەیلوولی 1988 بەردەوام بوو، قۆناخی سێی ئەنفال کە رۆژی 14-4ـی 1988بوو، بەهۆی ئەوەی زۆرترین قوربانیی هەبوو گەورەترین کۆمەڵکوژییە بە بەراورد بە قۆناخەکانی دیکە، بۆیە بە رۆژی ئەنفال دیاریکراوە.
مەسرور بارزانی، سەرۆکوەزیرانی هەرێمی کوردستان لە راگەیێندراوێکدا لە ساڵیادی ئەنفالدا دەڵێت: "ئەمڕۆ بە دڵێکی پڕ لە خەم و کۆڤانەوە، یادی شەهیدان و قوربانییانی شاڵاوە بەدناوەکانی (ئەنفال) دەکەینەوە، کە یەكێک بوو لە دڕندانەترین شێوازی جینۆساید دژی گەلی كورد و كوردستانیان."
35 ساڵ لەمەوبەر، وەک مەسرور بارزانی دەڵێت، "رژێمی بەعسی عێراق، بە چەند قۆناخێكی جیا، بە هەزاران خەڵكی سیڤل و بێتاوانی گوند و ناوچە جیاجیاكانی كوردستانی راپێچ كرد و لە بیابانەكانی باشوور و ناوەڕاستی عێراق زیندەبەچاڵی كردن و بەشێكی زۆریان تائێستاش بێسەروشوێنن و چارەنووسیان نادیارە."
مەسرور بارزانی داوا لە حکومەتی عێراق دەکات هاوکاری حکومەتی هەرێمی کوردستان بکات بۆ ئەوەی "بە شێوەیەکی باشتر، بتوانێت خزمەتی کەسوکاری سەربەرزی شەهیدان بکات."