رووداو دیجیتاڵ
نزیکەی 48 کاژێر بەسەر رووداوی داڕمانی کانێکی زێڕ و گیرخواردنی نۆ کرێکار لەنێو کانە داڕماوەکەدا تێپەڕیووە و پرۆسەی گەڕان بۆ رزگارکردنیان بەردەوامە.
ئێوارەی ئەمڕۆ چوارشەممە 14ـی شوباتی 2024، رەجەب تەیب ئەردۆغان، سەرۆککۆماری تورکیا لە قاهیرەی پایتەختی میسرەوە، لەبارەی داڕمانی کانێکی زێڕ لە شارۆچکەی ئیلیچ-ی سەر بە پارێزگای ئەرزینجان-ی باکووری کوردستان و گیرخوادنی نۆ کرێکارەکە قسەی بۆ رۆژنامەڤانان کرد.
سەرۆککۆماری تورکیا باسی لەوەکرد، 850 کارمەندی پسپۆڕ کە 339یان کارمەندی گەڕان و رزگارکردنن، بە 626 ئۆتۆمبێلی جۆراوجۆری فرەمەبەست، 32 ئامێر، 97 تاوەری رووناککردنەوە، 6 درۆن بە تەکنۆلۆژیای خوێندنەوەی پێوەری گەرمیی لەشی مرۆڤ و 44 موەلیدە، بەردەوامن لە هەوڵی گەڕان و دۆزینەوەی نۆ کرێکارە گیرخواردووەکە.
بەپێی دوایین زانیارییەکانی سه‌رۆكایه‌تیی كاره‌سات و باری له‌ناكاو (ئافاد)، لەکاتی داڕمانی کانەکەدا، لە کۆی ئەم نۆ کرێکارەدا پێنجیان لەنێو کۆنتێنەر، سیانیان لەنێو ئۆتۆمبێل و یەکێکی دیکەشیان لەنێو بارهەڵگرێکدا بووە بەهۆی بوونی گازی تایبەت کە ترسی دزەکردنی هەیە و ژیانی کرێکارەکان دەخاتە مەترسییەوە، پرۆسەی گەڕانی سست کردووە. هاوکات لە چەند قۆڵێکەوە هەوڵەکان بەردەوامن بۆ دۆزینەوەیان.
بەگوێرەی دوایین زانیاری، ناسنامەی حەوت لەو کرێکارانە ئاشکرا کراوە کە وێنەی شەشیان بەردەستە. ناوەکانیان بەمشێوەیەن: شەعبان یڵماز، کەنعان ئۆز، ئیبراهیم کەکلیل، عەدنان کەکلیل، حوسێن کایا، رەمەزان چیمەن و ئوغور یڵدز.
کۆمپانیای Anagoldـی کەنەدی بەرپرسی کانە زێڕەکە بووە کە 667 کرێکار بە سێ شەفت کاریان کردووە، بەردەوام ئۆپۆزیسیۆن رەخنەی لە جۆری کارکردنی هەبووە لەو کانانەی تێیدا کاریان کردووە، بەتایبەتیش لەم کانە زێڕە، کە لە ساڵی 2018ـەوە تەندەرەکەی بۆ دەرچووە. هەربۆیە لە ساڵی 2022ـدا بەهۆی دزەکردنی گیراوەی سیانوور، کانە زێڕەکە خرایە کارنامەی تورکیا. بەهۆی ئەوەی 350 مەتر لە نزیک رووباری فوراتە، مەترسی بڵاوبوونەوەی سیانوور هەیە.
سەندیکای کاری سەربەخۆی کانەکانی تورکیا بڵاویکردەوە، رۆژی رووداوەکە کرێکاران دزەیەکیان لە کانەکەدا دەستنیشانکردووە و بەرپرسانی خۆیان ئاگادارکردووەتەوە، بەڵام کارەکە رانەگیراوە.
سەبارەت بە رووداوەکەش لێکۆڵینەوە دەستیپێکردووە و تاوەکو ئێستا حەوت بەرپرسی ئەو کۆمپانیایەی خاوەنی کانەکەن، دەستبەسەر کراون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ